زرمبش براڈ کاسٹنگ کارپوریشن (ZBC) ءِ ڈائریکٹر ءَ گْوشتگ کہ ادارہ ءَ یک ارزشداریں گامگیجے زُرتگ ءُ زرمبش ٹی وی انگلش ءِ کار پہ دلجمی بندات کُتگ۔ اے نوکیں گامگیج ءِ بندات گوں یک انگریزی ڈاکومنٹری یے ءَ کنگ بیت کہ آ زور بیگواھیں مردمانی درد، انتزار ءُ انسانی گم ءُ اندوھاں میان استمانی زبان ءَ درشان ءُ پیش کنت۔
آئی گْوشگ اِنت کہ کجام ھم دلجم ءُ اُوشت مندیں میڈیا پلیٹ پارم ءِ بُنگیج انسانی جیڑہ ءُ راستی ءِ توار ءَ گوں ھم پت بوَگی اِنت، ءُ ھمے مئے لوٹ ءُ گرز اَنت۔
ڈائریکٹر ءِ رِد ءَ زرمبش ٹی وی انگلش ءِ اے سپر وھدی یا انچائیں جھد ءُ کوشستے نہ اِنت، بلکیں یک ڈُبّہ ءُ راجی زمہ واری یے۔ ڈاکومنٹری ءَ پد ادارہ گام پہ گام دیم ءَ جُنزان کنت دانکہ بلوچ راج ءِ درد ءِ گْرانیں بار ءَ گوں راستی ءِ رنگاں پہ اِش کنوکاں سر بہ کنت۔ آئی اے ھم گْوشتگ کہ اے گامگیج ءُ اَمَل ءِ مول ءُ مراد، مکسد تھنا ھبر ءِ سر کنگ نہ اِنت، بلکیں بلوچ ءِ درد ءِ توار پہ ھما چاروک ءُ گوشداروکاں سر کنگ اِنت کہ آ انسانی ھک، اِنساپ ءُ ایردستیں راج ءِ جیڑھانی اِش کنگ ءُ پوہ بوَگ ءِ بود ءُ توان دار اَنت۔
دیمتِر ءَ آئی گْوشتگ کہ اے جُھد چوناھیا اولی گامگیج اِنت، بلے چریشی ءَ پد زرمبش ٹی وی انگلش یکشل ءَ ھبرانی اپڈیٹاں گوں یک دلجمیں رنگے ءَ میڈیا پلیٹ پارم ءِ دْروشم ءَ دیم ءَ کار اِیت۔ ما آستہ بلے پہ سِتک گاماں دیم ءَ شھار دے اِیں، گوں ھمے اُمیت ءَ کہ بلوچ راج زرمبش ءِ ھمگام بیت، پرچا کہ زرمبش تھنا ھچ کُرت نہ کنت۔ چوش کہ زرمبش ٹی وی انگلش دراَسل ھمے اِرادہ ءِ درشان اِنت کہ بلوچ راج ءِ درد، جست ءُ راستی تھنا ھندی تک ءَ بندوک مہ بیت، بلکیں دنیا ءِ دیم ءَ ھم پدّر ءُ شرپداریں رنگے ءَ پیش کنگ بہ بیت۔
