بلوچ یکجھتی کمیٹی (بی وائی سی) ءَ وتی درشانے ءَ زوربیگواھیں ایاز بلوچ ءِ در کانودی کوش ایر جتگ ءُ گوشتگ کہ ایاز اھمد ء دوست مھمد یک ٹیچرے بوتگ ءُ گیشکور ءِ جاھمنند اَت، 16 اکتوبر 2025 ءَ پاکستانی پوج ءَ آوار جنگ ءَ پد بیگواہ کرتگ۔
آئی گوشتگ کہ ھندی مردمانی گوشگ انت پاکستانی پوج ءَ ایاز بلوچ چہ گیشکور بازار ءَ آوار جتگ، آئی کھول داں ماھاں سسائی جنجالانی دیمپان بوتگ ءُ مدام چہ سرکار ءَ جست گرگ ءِ جھد کرتگ، بلے آئی بابت ءَ چہ سرکار ءِ نیمگ ءَ ھچ وڑیں ھال دیگ نہ بوتگ۔ 6 جنوری 2026 ءَ ایاز بلوچ ءِ لاش دست کپتگ چہ ایشی ءَ ھمے پدر بیت کہ پاکستانی پوج ءَ ایاز بندیگ جاھاں آزار داتگ ءُ درکانودی کشتگ۔
آئی گوشتگ کہ ایاز بلوچ ءِ کوش دگہ جتائیں ویلے نہ انت بلکیں بلوچ مھلوک ءِ بگیری ءَ پاکستانی پوج ءِ برجاھیں زوراکی ءِ پدریں منانکے۔اے زوراکی ءِ رد ءَ ٹیچر، نودربر ءُ آدگہ شھریانی زور بیگواہ، آزار دیگ ءُ درکانودی کشگ بوگ ءَ اَنت۔
آئی ءَ دیمتر ءَ گوشتگ کہ بلوچ ورنا ءُ وانندگانی پہ زانت نشانگ کنگ، ترس، بے تواری ءُ مچی سزا ءِ یک پالیسی یے پیش دار ایت۔ اد ءَ کانود، انساپ ءُ انسانی شرپ یکشل ءَ لگتمال کنگ بوگ ءَ اَنت ۔ میان استمانی تک آ زوت دزمانجنی بہ کنت ءُ زمہ واراں جست بہ گیت ءُ گیشیں زوراکی ءُ پہ انسانی جانانی تاوان ءِ دارگ ءَ مھکمیں گامگیج بہ زور اَنت۔
