بلوچ اسٹوڈنٹس آرگنائزیشن آزاد ءِ چیئرمین شولان بلوچ ءَ وتی شنگ کرتگیں درشان ءَ گوشتگ کہ پاکستانی چیریں ادارھانی نیمگ ءَ بلوچ زالبولانی زوریں بیگواھی ءِ گیش بوگ چکچینی ءِگنتریں دروشم اِنت ءُ میان استمانی انسانی ھکانی ادارھانی بے تواری ءِ سر ءَ بژن اِنت۔
آئی ءَ گوشتگ کہ پاکستانی لشکری ادارھانی نیمگ ءَ بلوچ روایتانی لگتمال کنگ ءُ بلوچ زالبولانی کمشرپ کنگ ءَ نہ من ایں۔ ھمک روچ بلوچ زالبول مچی سزا ءِ پارست ءَ زور بیگواہ کنگ ءُ آزار دیگ بوگ ءَ اَنت۔ رسانکدر ءِ پارست ءَ آیانی سر ءَ دروگیں بھتام جنگ بوگ ءَ اِنت۔ پیر ءُ نادراھیں زالبول آزار دیگ ءُ زنداناں بندیگ کنگ بنت۔
شولان بلوچ ءَ گوشتگ کہ پاکستانی لشکری ادارہ انچو بے مھار اَنت کہ آ لس آبادیانی سر ءَ ڈرون ارش ءُ گوں نوکیں سلاھاں ارش کنگ ءَ اَنت۔ کاؤنٹر ٹیررازم ءِ گپانی پژدر ءَ وتی بلوچ چکچینی ءِ پالیسی ءَ نیمون پیش کنگ ءَ اَنت۔
آئی ءَ گوشتگ کہ پاکستان ءِ مول ھمیش اِنت کہ آ بلوچ زالبولانی سر ءَ اے زوراکی ءَ دودے جوڑ بہ کنت دانکہ چہ لس مھلوک ءَ زھرشانیاں بہ رک ایت۔ بلوچ زالبولانی گون ءَ زوراکی وتی گڈی سیمسر ءَ سر بوتگ ءُ ایشی گر ءُ دار ھژدری اِنت۔
شولان بلوچ ءَ گوشتگ کہ پاکستان ءَ 1970 ءَ بنگلہ دیش ءَ چونیں زوراکی کرتگ آ گوستانک ءِ سیاھیں درے اَنت۔ بنگلہ دیش ءِ آجوئی زرمبشت ءِ میان ءَ پاکستانی پوج ءَ لکانی کچ ءَ بے میاریں مردمانی گون ءَ زوراکی کرتگ۔ بنگلہ دیش ءِ زالبول مچی زوراکی، کشت ءُ کوش ءُ زوریں بیگواھیانی دیمپان بوتگ اَنت۔
آئی ءَ گوشتگ کہ مرچی پاکستان بلوچ زالبولانی گون ءَ ھما وڑ کنگ ءَ اِنت ءُ چکچینی ءِ واھشت گندگ بوگ ءَ اِنت کہ ھما وڑ یک وھدے بنگلہ دیش ءَ کنگ بوتگ اَت۔ چہ اے جاوراں ھمے گندگ بیت کہ پاکستان ءَ بنگلہ دیش ءَ کرتگیں زوراکیانی ھلاس کنگ ءَ ابید ھما زوراکیاں بلوچستان ءَ کنگ ءَ اِنت۔
شولان بلوچ ءَ وتی درشان ءِ گڈی ءَ گوں بلوچ راج ءَ لوٹ کرتگ ءُ گوشتگ کہ اے زوراکیانی بگیری ءَ گھگیری بہ کن اَنت ءُ اے زوراکی ءَ برجاہ بوگ ءَ پیش ایشی ھلاس بہ کن اَنت۔ بلوچ سیاسی ءُ لس زالبول چہ پاکستان ءِ لشکری ادارھانی نیمگ ءَ زوراکیاں بہ رک اَنت ءُ ایمنیں زندے بہ گوازین اَنت۔
