بلوچ نیشنل موومنٹ ( بی این ایم ) ءِ انسانی ھکانی ادارہ پانک ءَ وتی شنگ کرتگیں درشانے ءَ چہ ھزدار ءَ زور بیگواھیں پرزانہ زھری ء مھمد بکش زھری ءِ زوریں بیگواھی گوں ترندیں دانکاں ایر جتگ ءُ گوشتگ کہ آ ھزدار ءِ ھند زھری ءِ جاہ منند اِنت یک دسمبر 2025 ءِ شپ ءَ چہ ھزدار ءَ ھما وھد ءَ آوار جنگ بوتگ کہ آ چہ نادراھجاہ ءَ دیم پہ گس ءَ روگ ءَ بوتگ۔ انگت ءَ آئی بابت ءَ ھچ وڑیں سرپدی نیست۔
پانک ءِ رد ءَ اے کھول چہ زھری ءَ لڈ ءُ بار کرتگ ءُ ھزدار ءَ نشتگیں مردم اَنت۔ اے زوراکی ھمے چیز ءَ پیش دار ایت کہ بلوچ چہ لڈ ءُ بار کنگ ءَ پد ھم یکشل ءَ نشانگ کنگ بوگ ءَ اَنت۔ چہ ادارھانی نیمگ ءَ نہ آئی دزگیری پدر کنگ بوتگ ءُ نہ آئی دگہ کانودی نیمونے پیش کنگ بوتگ پمشکا اے ویل زوریں بیگواھی گوشگ بیت۔ اے وڑیں گامگیج بنکی انسانی ھک ءُ میان استمانی کانود ءِ تچک ءَ بگیری اِنت۔
آئی ءَ گوشتگ کہ اے زوریں بیگواھی ءِ زمہ وار ریاست ءُ آئی لشکری ادارہ اَنت۔ ما ھمے لوٹ ءَ کن ایں کہ آ آمیدگس ءَ پیش کنگ بہ بیت اگاں بے میار اِنت گڑا یل کنگ بہ بیت۔
پانک ءَ گوں میان استمانی انسانی ھکانی ادارھاں لوٹ کرتگ کہ اے جیڑہ ءِ بابت ءَ دلگوش ءَ گور بہ کن اَنت ءُ پاکستان سرکار ءَ زور بدے اَنت کہ بلوچستان ءَ زوریں بیگواھی ءِ درچ بند کنگ بہ بیت۔
