کیچ ءِ ھند تجابان ءَ پاکستانی پوج ءِ دست ءَ زور بیگواھیں مجاھد بلوچ، پرید بلوچ، ھانی ءُ ھیر النسا بلوچ ءِ کھول ءِ نیمگءَ زھرشانی نندانک ءَ سے روچ اِنت کہ برجاہ اِنت۔
اے وھد ءَ بازیں کچے ءَ مردم زھرشانی جاہ ءَ نشتگ اَنتءُ چہ دگ ءِ بند بوگ ءِ سوب ءَ دوئیں نیمگاں گاڑیانی مزنیں کتار اوشتوک اَنت۔
بیگواھیں زالبول ھانی بلوچ ءُ ھیر النسا بلوچ 20 دسمبر ءَ چہ ھب چوکیءِ ھند داروھوٹل ءَ آوار جنگ بوتگ اَنت ءُ مجاھد ءُ پرید جتائیں وھداں چہ کیچءَ آوار جنگ ءُ بیگواہ کنگ بوتگ اَنت۔
چہ دمگی انتزامیہ ءِ نیمگ ءَ اسسٹنٹ کمشنر مھمد ھنیپ ءِ سروکی ءَ ٹولی یے زھرشانی نندانک جاہ ءَ شتگ ءُ گوں بیگواھیں مردمانی کھولاں گپ ءُ تران کرتگ ءُ زھرشانی ءِ ھلاس کنگ ءِ لوٹ کرتگ بلے کھولاں گوشتگ دانکہ مئے مردم آجو کنگ نہ بنت ما وتی زھرشانی ءَ ھلاس نہ کن ایں۔
آیانی گوشگ اِنت کہ چہ سرکارءِ نیمگ ءَ پہ مئے مردمانی آجوئی ءَ گامگیج زورگ ءَ ابید آیانی سر ءَ دروگیں بھتام جنگ بوگ ءَ اِنت۔
