بلوچ نیشنل موومنٹ ( بی این ایم ) ءِ کارگشاد دل مراد بلوچ ءَ بی این ایم ءِ جوڑ بوگ ءِ روچ ءِ درگت ءَ ماں چاگردی رسانکدر ءَ وتی شنگ کرتگیں درشانے ءَ گوشتگ کہ مرچی بلوچ نیشنل موومنٹ ءَ وتی دیمونی، ھون ءُ کید ءُ بندیگی ءَ چکاریں سپر ءَ سی ءُ ھشت سال سرجم کرتگ۔ مرچیگیں روچ، یک مردمے، اھدے یا کسانیں نپے ءِ سیاست نہ اِنت بلکیں یک یکشلیں راجی جھدے ءِ مھکمی ءِ چیدگ اِنت، ایشی بنیاد 1987 ءَ شھید پدا اھمد ءُ آئی سنگتاں ایر کرتگ۔ بی این ایم ءِ جوڑشت ھمے ارادہ ءِ بنیاد ءَ بوتگ کہ بلوچ راج وتی پجار، پدریچ ءُ راجی وتواکی ءِ واھند بہ بیت۔
آئی ءَ گوشتگ کہ اے سی ءُ ھشت سالاں بی این ایم ءَ چونیں دیمونی داتگ آ گوستانک ءِ لھتیں تاکدیماں نہ بلکیں رتکگیں ھونانی یک شھجوے تچگ ءَ اِنت۔ چیئرمین گلام مھمد ءِ کوش یک سروکے ءِ کوش اَت، کارگشاد ڈاکٹر منان جان ءِ کوش یکجاہ کنوکے ءِ کوش اَت، رسانکدری کارگشاد ھاجی رزاک ءِ کوش لیکھی تمردی ءِ کوش اَت، گھبودی کارگشاد سمد تگرانی، رسانکدری کارگشاد رزاک گل، کمک کارگشاد رسول بکش مینگل، بنجاھی پتر ءِ باسک استاد الی جان، ساجد بلوچ ءُ کماش نسیر کمالان ءِ کوش بی این ایم ءِ ھلاس کنگ ءِ جھد اَت، بنجاھی سروک ڈاکٹر دین مھمد بلوچ ءُ گپور بلوچ ءِ درکانودی ءُ در انسانی بندیگ کنگ بی این ایم ءِ ترسناکیں نشانگ کنگ ءِ کوشست اَت، بی این ایم ءِ سر ءَ پہ جار پابندی جنگ نہ بوتگ بلکیں چہ پابندی ءَ گنتریں زوراکیانی دیمپان کنگ بوگ ءَ اِنت۔ پمشکا کہ بی این ایم بلوچ راجی آجوئی زرمبشت ءِ ھما سیاسی سنگر اِنت کہ آئی پاکستان ریاست ءِ بنیاد لرزینتگ۔
دل مراد بلوچ ءَ گوشتگ کہ ما اے ودی بوگ ءِ روچ ءِ درگت ءَ ھمے کول ءَ کن ایں کہ ھما وڑ ءَ بی این ایم ءَ بے ترس ءَ وتی راجی آجوئی ءِ لیکہ زندگ داشتگ دیم ءَ ھم ھمے وڑ ءَ یکشل ءَ پہ زانشت ءُ بے ترس ءَ گوں راجی لوٹ ءَ دیم ءَ جنزاں کنت۔ بی این ایم چہ شھیدانی ھوناں توانمند بیت ءُ پہ وتی آھوکیں پدریجاں راھے گیشین ایت۔ گوستانک شاھد اِنت کہ ھما زرمبشت وتی شھید، وتی بندیگانی واھشت ءُ وتی راھبندانی پاسداری ءَ کنت آ ایر دست نہ بیت بلکیں وتی راج ءِ تالہ ءَ مٹ کنت۔
