بلوچ یکجھتی کیٹی ءِ سروک ڈاکٹر ماہ رنگ بلوچ ءَ چہ ھدہ جیل ءَ وتی شنگ کرتگیں درشانے ءَ گوشتگ کہ منی پت ءَ زوریں بیگواھی ءِ میانءَنواب اکبر ءِ شھیدی ھال چہ روتاکے ءَ رستگ کہ آ گوں ھشکیں نانے ءَ پیڑاھوک بوتگ۔ آئی گوشگ اِنت کہ اے ھال ءَ من ءَ سکا سسائی جنجالانی دیمپان کرتگ۔ انچوش کہ من گوستگیں نُھ ماہ بیت کہ زندان ءَ بندیگ آں چہ بلوچستان ءَ یکشل ءَ زوریں بیگواھی ءُ درکانودی کوشانی ھال سر بوگ ءَ اِنت۔ من مدام پہ گندُک ءَ اتکگیں مردماں ھمے جست ءَ کن آں کہ مرچی پد ءَ دگہ بے میاریں مردم کشگ نہ بوتگ؟ منی سرڈگار ءَ دگہ چنت بچک ءُ جنک اے بے رھمیں ریاست ءِ دست ءَ بیگواہ کنگ بوتگ۔
آئی ءَ گوشتگ کہ بیست دسمبر ءِ روتاک ءَ من ءَ دگہ یک دردناکیں ھالے داتگ۔ اے روچ ءَ بلوچ سیاسی کارکن بانک کریمہ ءِ شھیدی ءِ پنچمی سال اَت من گوں گلزادی ءُ بیبو ءَ کراچی ءَ داں تمپ ءَ روگ ءَ لاش ءِ برگ ءِ دردیگیں کسہ ءَ کنگ ءَ اِت آں کہ ھمے میان ءَ مارا ماما کدیر ءِ بیرانی ءِ ھال سر بوت۔
ڈاکٹر ماہ رنگ بلوچ ءَ گوشتگ کہ ماما کدیر بلوچ راجی رزمبشت ءِ مھکم ءُ تمردیں سیاسی کارکن اَت۔ آئی داں شانزدہ سالاں پہ زور بیگواھیں مردمانی آجوئی ءَ یکشلءَ جھد کرتگ۔ ماما کدیر ءِ سروکی ءَ اے برجاھیں بنجل ءَ منی گون ءَ ھوار بلوچستان ءِ ھمک سیاسی کارکن بندات ءَ سیاست ءِ ھیل دیگ ءَ جوانیں کرد پیلو کرتگ۔ اے گدانءَ ایریں اکس چہ دو دھکاں بلوچ چکچینی ءِ ندارگ ءَ جھانءَ پیش دارگ ءَ اَنت۔ یک انچیں وھدے اَت کہ پاکستانی رسانکدر بلوچستان ءَ انسانی ھکانی لگتمالیانی سر ءَ بے توار اَت ءُ بے شرپیں سیاست داں وتگڑیں دیمروئی ءِ دروگ ءَ بندگ ءَ اِت اَنت، اے گدان بلوچستان ءَ برجاھیں ریاستی ھونریچیاں پاشک کنگ ءَ بوتگ۔
آئی ءَ گوشتگ کہ بلوچ سرڈگار ءَ لاش چگل دیگ بوتگ ءُ پہ ھکاں جھد کنوکیں درسیں سیاسی گلانی سروک زور بیگواہ کنگ یا شھید بوگ ءَ بوتگ اَنت، آیانی تہ ءَ یکے ماما کدیر ءِ زھگ جلیل ریکی ھم ھوار اِنت۔ بلے ماما کدیر چہ گمیگ بوگ ءِ جاہ ءَ آئی سنگتانی آجوئی ءِ مانزمانی وتی کوپگاں زرتگ۔ آ ھمک سانمندیں کھول ءِ توکل جوڑ بوتگ کہ آیانی آزیز ریاستی زوراکیانی آماچ بوتگ اَنت۔
ڈاکٹر ماہ رنگ بلوچ ءَ گوشتگ کہ وھدے زوریں بیگواھی تیز بوتگ گڑا ھمک ماہ ءَ پوسٹر مٹ بوتگ اَنت۔ اے ھما گدان اِنت اد ءَ بندات ءَ زاکر مجید ، جلیل ریکی ءُ الی ازگر بنگلزھی ءِ وڑیں لھتیں سیاسی کارکنانی پہ آجوئیءَ جنگ بوتگءُ رند ءَ اے پہ بلوچستان ءَ زور بیگواھیں مردمانی آجوئی ءَ مھکمیں زرمبشتے جوڑ بوتگ۔ گدان ءِ چاریں نیمگاں ھما نہ ترسیں ورنایانی اکس جنوک بوتگ اَنت کہ آیان ءَ پاکستانی پوج ءَ بیگواہ کرتگ۔
آئی ءَ گوشتگ کہ اے شانزدھیں سالانی میان ءَ ماما کدیر وتی درسیں زاتی واھشت پہ جھد ءَ ببا داتگ اَنت۔آئی وھدےگوں چونیں اھوالکار ءُ سیاسی کارکنے ءَ زوریں بیگواھیں مردمانی جیڑہ ءِ سر ءَ گپ ءَ وتی شھیدیں زھگ جلیل ریکی ءِ گپ جتگ گڑا آئی دیم ءِ رنگ مٹ بوتگ، آئی من ءَ گوشت کہ من جلیل ریکی ءِزھگ ءَ آئی کبر ءِ سر ءَ بران ءُ آئی ءَ ھمے گوش آں کہ تئی پت بے رھمیں ریاست ءَ آزار دیگ ءَ پد کشتگ ءُ تئی پت ءِ کشندہ ریاست اِبت، دانکہ آ اچمن پد بلوچ راجی زرمبشت ءِ بھر بہ بیت۔
ڈاکٹر ماہ رنگ بلوچ ءَ گوشتگ کہ ماما کدیر بلوچ راجی زرمبشت ءِ یک مسالی ءُ بے دروریں سیاسی کارکنے ءِ بستار ءَ مدام گیر آرگ بیت۔ ماما کدیر ءِ دیمونی، توکل ءُ یکشلیں جھد پہ بلوچ راجی زرمبشت ءِ درسیں سیاسی کارکناں مادنیں کشکے اَنت۔
