بلوچ نیشنل موومنٹ ( بی این ایم ) ءِ چیئرمین ڈاکٹر نسیم بلوچ ءَ وتی شنگ کرتگیں درشانے ءَ گوشتگ کہ بلوچ کارکن ماہ زیب شپیک پاکستان ءِ ریاستی پالیسیانی یکبرے پد ءَ نشانگ بوتگ۔ آ پہ وتی ناکو راشد ھسین ءِ سلامتی آجوئی ءَ پرایمن ءُ کانودی جھد ءَ بوتگ پد ءَ ھم پاکستانی پوج ءَ آئی کھول ءِ رنج گیش کرتگ اَنت ءُ آئی پت شپیک زھری آوار جتگ ءُ بیگواہ کرتگ۔
آئی ءَ گوشتگ کہ اے زوراکی دگہ جتائیں ویلے نہ اِنت بلکیں یک مھکمیں شوربندی یے ءِ پارست ءَ ریاستی ادارہ پہ بگیریانی دارگ ءُ انساپ ءِ لوٹ کنوکانی بے تواری ءَ سرجمیں کھولاں نشانگ کن اَنت۔
ڈاکٹر نسیم بلوچ ءَ گوشتگ وھدے کہ سانمندیں کھول پہ وتی آزیزانی آجوئی ءَ توار چست کن اَنت گڑا آیان ءَ انساپ دیگ ءِ جاہ ءَ زوراکیانی دیم پہ دیمی کنگ لوٹ ایت۔
بی این ایم ءِ چیئرمین ءَ گوشتگ کہ ماہ زیب بلوچ ءِ جھد بازیں کچے ءَ بلوچ جنینانی جھگیری ءَ کنگ ءَ اِنت کہ آ زوریں بیگواھی، بیھار ءُ ریاستی زوراکیانی بگیری ءَ پہ وتی کھولاں توار چست کنگ ءَ لاچار اَنت۔
آئی ءَ گوشتگ کہ راشد ھسین ءِ پہ سلامتی آجوئی ءَ لوٹ ءِ گوش دارگ ءَ ابید سرکار ءَ پہ ماہ زیب ءِ سزا دیگ ءَ آئی پت شپیک زھری زور بیگواہ کرتگ۔
ڈاکٹر نسیم بلوچ ءَ گوشتگ کہ شپیک زھری ءِ زوریں بیگواھی میان استمانی انسانی ھکانی کانود ءِ بگیری اِنت ءُ ھمے گپ ءِ منانک اِنت کہ پاکستان بلوچستان ءَ مچی سزا ءَ چو سلاہ ءِ وڑ ءَ کار گرگ ءَ اِنت۔
بی این ایم ءِ چیئرمین ءَ گڈی ءَ گوشتگ کہ اے زوراکی ھمے راستی ءَ پیش دار ایت کہ بلوچستان ءَ انساپ لوٹوکیں کھول چہ درساں زبھر کنگ بوگ ءَ اَنت۔
