کراچی ءُ شال ءَ سی ٹی ڈی ءُ چیریں ادارھانی کارمنداں نودربرے ءَ ھوار ھپت مردم آوار جنگ ءَ پد بیگواہ کرتگ۔
بنشون ءِ رد ءَ کراچی ءِ ھند شراپی گوٹ ءَ پرندوشی کاؤنٹر ٹیررازم ڈیپارٹمنٹ (سی ٹی ڈی) ءَ بازیں کچے ءَ بیڑ برتگ ءُ شش ورنا زبیر شپی، نزیر ھنیپ، ھزیپہ ارپان، منور آتپ، اسھاک ءُ اھمد گل آوار جتگ ءُ بیگواہ کرتگ اَنت۔
سی ٹی ڈی ءَ بیڑ برگ ءِ میان ءَ بازیں گس پٹ اِتگ اَنت ءُ گوں مردماں زوراکی کرتگ ءُ گسانی سامان ھم پروشتگ اَنت۔
ھمے وڑ ءَ چہ شال ءَ بلوچستان یونیورسٹی ءِ مزنیں دروازگ ءِ دیم ءَ یک سمبر 2025 ءَ پاکستانی پوج ءِ جوڑ کرتگیں چیریں ادارھانی کارمنداں اھمد شاہ ء زاھر شاہ آوار جتگ ءُ بیگواہ کرتگ۔
اھمد شاہ ءِ بابت ءَ گوشگ بیت کہ نودربرے ءُ پنجگور ءِ ھند چتکان ءِ جاہ منند اِنت۔
