اسلام آباد ءَ کائد آزم یونیورسٹی ءَ پہ نودربر سئید بلوچ ءِ آجوئی ءَ بلوچ اسٹوڈنٹس کونسل ءِ زھرشانی ءَ ھپت روچ سرجم بیتگ کہ انگت برجاہ اِنت۔
زھرشانی کنوکیں نودربرانی گوشگ اِنت کہ مارا ھپتگے بیت پہ انساپ ءَ زھرشانی نندانک ءَ نشتگ ایں بلے انگت ءَ چہ یونیورسٹی ءِ انتزامیہ ءُ اسلام آباد انتزامیہ ءِ نیمگ ءَ پہ مئے لوٹانی منگ ءَ ھچ وڑیں گامگیج زورگ نہ بوتگ۔
آیانی گوشگ اِنت کہ یونیورسٹی ءَ 28 نومبر ءَ ھما رپورٹ نودربرانی دیم ءَ پیش کنگ بوتگ انگت پیش نہ کرتگ، سئید بلوچ ءِ کیس ءَ یک دسمبر ءَ جست ءُ پرس کنگی بیت آ ھم بے نیمون ءَ متھل دارگ بوتگ۔ بلے انتزامیہ یکشل ءَ پہ مئے زھرشانی ءِ ھلاسی ءَ پندل سازگ ءُ زوراکی کنگ ءَ اِنت۔
بلوچ اسٹوڈنٹس کونسل ءِ گوشگ اِنت دانکہ مئے لوٹ منگ نہ بیتگ اَنت ما وتی زھرشانی ءَ برجاہ دار ایں ءُ ایشی درسیں زمہ واری کائد آزم یونیورسٹی ءُ اسلام آباد انتزامیہ ءِ سر ءَ بنت۔
