شال: وائس پار بلوچ مسنگ پرسن ( بی وی ایم پی ) ءَ وتی شنگ کرتگیں درشانے ءَ گوشتگ کہ وی بی ایم پی ءَ زوربیگواھیں ساکب اھمد بزدار ء اھمد ھان ءِ کیس پہ زور بیگواھیں مردماں جوڑ بیتگیں کمیشن ءُ سرکار ءَ داتگ۔ گل ءَ گوں بلوچستان سرکار ءُ کمیشن ءَ لوٹ کرتگ کہ آ پہ ساکب اھمد بزار ءِ سلامتی آجوئی ءَ کرد پیلو بہ کن اَنت۔
آئی گوشگ اِنت کہ کھول ءَ ساکت اھمد بزدار ءِ کیس ءِ یاداشت کنگ ءِ میان ءَ گوشتگ کہ ساکب اھمد ءَ ڈیھ ءِ ادارھانی کارمنداں 27 اگست ءَ چہ شال ءِ ھند جناہ دگ ءَ آوار جتگ ءُ بیگواہ کرتگ۔ مارا آئی بابت ءَ انگت ءَ سرپدی دیگ ءَ نہ اَنت۔
کھول ءِ گوشگ اِنت کہ ساکب اھمد ءِ زوریں بیگواھی ءِ سی سی ٹی وی پوٹیج ھم ھست چہ آئی ءَ ساپ گندگ بیت کہ ساکب اھمد چہ اے ٹی ایم ءَ زر کشگ ءَ پد ڈن ءَ آھگ ءَ اِنت کہ آئی ءَ ادارھانی کارمند آوار جن اَنت ءُ پہ زور گاڑی ءَ سوار کن اَنت۔ چہ پوٹیج ءَ ساپ گندگ بیتگ آ گاڑی شال ءِ کینٹ ءَ پتر اَنت۔
وی بی ایم پی ءِ چیئرمین نسراللہ بلوچ ءَ کھول دلبڈی داتگ کہ گل ءِ نیمگ ءَ ساکب اھمد بزدار ءِ کیس ءَ پہ کانود ءِ انساپ ءَ جوڑ کنگ بیتگیں ادارھاں دیگ بیت ءُ پہ آئی آجوئی ءَ ھمک جاہ ءَ توار چست کن ایں۔
آئی ءَ گوں سرکار ءُ ڈیھ ءِ ادارھاں لوٹ کرتگ کہ ساکب اھمد ءِ سر ءَ چونیں ھم بھتامے ھست گڑا دیم ءَ آرگ ءُ آمیدگس ءَ پیش کنگ بہ بیت، اگاں بے میار اِنت گڑا پہ آئی آجوئی ءَ دلجمی دیگ ءُ کھول چہ سسائی آزاراں کشگ بہ بیت۔
