بلوچ آجوئی لوٹوکیں سروک رھیم بلوچ ایڈوکیٹ ءَ ماں چاگردی رسانکدر ایکس ءَ وتی شنگ کرتگیں درشانے ءَ گوشتگ کہ بلوچستان کدی ھم پاکستان ءِ بھرے نہ بوتگ، بلکیں 1948 ءَ پہ زور ءُ پوج ءِ زوراکیاں دستیگ کنگ بوتگ۔ بلوچ چہ ھما روچ ءَ اے زورگپتی ءِ بگیری ءَ مڑگ ءَ اِنت۔
آئی ءَ گوشتگ کہ بلوچ راجی زرمبشت اے وھد ءَ گوستانک ءِ یک جوان ءُ مھکمیں جاھے ءَ سر بیتگ۔ پہ پاکستان ءَ بلوچستان ءِ زورگپتی ءِ برجاہ دارگ گراں بوان اِنت۔ ھمے سوب ءَ پاکستان جتائیں میان استمانی توانمند ءُ کمپنیاں پہ بلوچستان ءِ مڈیانی لٹ ءُ پل ءِ لوٹ کنگ ءَ اِنت۔
رھیم بلوچ ایڈوکیٹ ءَ گوشتگ کہ لس بلوچ ءُ چہ آجوئی لوٹوکیں بھرگ ءَ سی پیک ءَ ھوار آدگہ شوربندیانی بگیری ءَ گھگیری کرتگ ءُ آ ھمک اے وڑیں ریاست یا کمپنیانی دیم ءَ اوشت اَنت کہ آ گوں پاکستان ءَ ھواری ءَ مڈیانی لٹ ءُ پل کنگ ءِ جھد ءَ کن اَنت۔
آئی ءَ گوشتگ کہ نزوریں راجانی پہ زور مڈیانی لٹ ءُ پل ءَ میان استمانی نزام ءَ وتی دودمان ءُ کانودی بستار ھلاس کرتگ ءُ انسانی ھکانی ٹاپار جنوک نزوریں راجانی وتواکی ءَ ھر پیم ءَ میان آرگ ءَ نہ اَنت۔
رھیم بلوچ ایڈوکیٹ ءَ وتی درشان ءِ گڈی ءَ گوشتگ دانکہ بلوچستان آجو مہ بیت ءُ بلوچ راج ءِ وتواکی منّگ مہ بیت داں ھما وھد ءَ پاکستان ءِ گون ءَ ھچ وڑیں باپاری پھریز نہ بیت۔
