نیشنل ڈیموکریٹک پارٹی (این ڈی پی) ءِ جارکش ءَ وتی شنگ کرتگیں درشانے ءَ گوشتگ کہ بیگواھیں گنی بلوچ ءَ مرچی شش ماہ سرجم بوتگ کہ آ 25 مئی ءَ پاکستانی پوج ءَ چہ ھزدار ءَ ھما وھد ءَ آوار جتگ آ گوں مساپر بسے ءَ کراچی ءَ روگ ءَ بیتگ۔ آئی بیگواھی ءَ پد ریاستی ادارھاں انگت آئی بابت ءَ ھچ کانودی منانک پیش نہ کرتگ۔ یک سیاسی کارکنے ءِ در آئینی ءُ درکانودی بیگواہ کنگ انسانی بنکی ھک ءُ جمھوری آجوئی ءِ لگتمالی اِنت۔
آئی گوشتگ کہ اگاں گنی بلوچ ءِ سر ءَ چونیں بھتامے ھست گڑا آ کانود ءِ رد ءَ آمیدگس ءَ پیش کنگ ءُ وتی بے میار پیش کنگ ءِ ھک دیگ بہ بیت۔ آئی زوربیگواھی نہ تھنا یک مردمے ءِ بگیری ءَ زوراکی یے بلکیں کھول، سنگت ءُ سیاسی سنگتانی مچی سزا دیگ زانگ بیت۔
جارکش ءَ گوشتگ کہ سیاسی کارانی سر ءَ پابندی، کارکنانی زوربیگواھی یکشلا برجاہ اِنت کہ آ مئے جمھوری کارانی سر ءَ پابندی زانگ بیت۔ گل ءِ بنجاھی سروک سنا بلوچ کیتران دہ اگست ءَ چہ ملتان بالی پٹ ءَ ھما وھد ءَ بیگواہ کنگ بوتگ کہ آ پہ اُمرہ ءَ روگ ءَ بوتگ۔ ھمے وڑ ءَ چہ کراچی ءَ زاھد بلوچ ءُ بارکان ءَ ھنکین ءِ ڈپٹی آرگنائزر میر بلوچ ءَ ھوار آدگہ کارکن ھم انگت بیگواہ اَنت۔ سروک ءُ کارکنانی بگیری ءَ اے کاروائی سیاسی ءُ جمھوری ھکانی لگتمالی ءِ پدریں منانک اَنت۔
آئی گوشتگ کہ ما گنی بلوچ ءَ ھوار درسیں بیگواھیں سیاسی کارکنانی آجوئی ءِ لوٹ ءَ کن ایں در آئینی گامگیج بند کنگ بہ بیت ءُ اگاں چونیں مردمے ءِ سر ءَ بھتام ھست گڑا آ آمیدگس ءَ پیش کنگ ءُ وتی بے میار پیش کنگ ءِ ھک دیگ بہ بیت۔
آئی ءَ جار جتگ ءُ گوشتگ کہ گنی بلوچ ءِ زوربیگواھی ءِ شش ماہ سرجم بوگ ءَ 26 نومبر ءَ ماں رسانکدر ءَ یک کمپینے برجم دارگ ءَ ھوار ویبینار برجم دارگ بیت آئی سرجمیں ھال زوت رسانکدرءَ شنگ بیت۔
