بلوچ یونائیٹڈ آرمی ( یو بی اے ) ءِ جارکش مزار بلوچ ءَ وتی شنگ کرتگیں درشانے ءَ گوشتگ کہ 4 نومبر ءِ سھب ءَ ھپت ءُ نیم ءَ کلات ءِ ھند ناگائی کوہ ءَ زورگریں پاکستان ءَ ڈرون بالیگراب ءِ کمک ءَ گائیڈ میزائل اُرش کرتگ ایشی آسر ءَ سنگتیں گل بی ایل ایپ ءِ یک سرمچارے ءَ ھوار چار سنگت شھید بوتگ کہ گل آیاں ستک شانی ندر کنت۔
آئی ءَ گوشتگ کہ زورگریں ریاست ءِ ڈرون ارش ءَ پد چہ چست بیتگیں آس ءَ کِر ءُ کش ءَ ڈگار سکا ستکگ۔چہ نزیکیں چٹار ءُ سنگانی سر ءِ نشاناں ھمے زانگ بیت کہ کیمیائی شورہ ھم ھوار بوتگ۔
آئی ءَ گوشتگ کہ چہ ڈرون ارش ءِ آسر ءَ شھید بیتگیں سرمچار شھید ڈاکٹر مدسر شاھوانی پنام سربلند بلوچ، شھید شھباز ھان بڈانی مری پنام پیرجان، شھید شاکر جتوئی بلوچ پنام رودین بلوچ، شھید ھارس مھمد شھی بلوچ پنام آپتاب بلوچ ءَ آیانی جھد ءُ دیمونیانی سر ءَ ستک شانی ندر کن ایں۔
جارکش ءَ گوشتگ کہ شھید ڈاکٹر مدسر شاھوانی، بلوچ آجوئی لوٹوکیں گل بی ایل ایپ ءِ سنگتے اِنت ءُ مستونگ ءِ ھند چھوتو ءِ جاہ منند اِنت۔ چہ گل ءَ ھوار بوگ ءَ پد آئی نہ تھنا وتی جنگی بودناکی پیش کرتگ بلکیں آئی سنگت ءُ مھلوک ءِ تہ ءَ پہ الاج کنگ ءَ سکا جپاکشی کرتگ ما چہ وتی گل ءِ نیمگ ءَ شھید سنگت ڈاکٹر مدسر شاھوانی ءَ آئی گرانکدریں جپاکشی، دیمونی ءُ پہ انسانیت ءَ بے مٹیں جھد ءَ ستک شانی ندر کن ایں۔
آئی ءَ گوشتگ کہ شھید شھباز ھان مری 2019 ءَ یو بی اے ءَ ھوار بیتگ ءُ چہ ایشی ءَ پد آئی یکشل ءَ وتی بودناکی جھد ءِ پڑا کردی دروشم ءَ پیش کرتگ اَنت۔ جنگ ءِ پڑا چہ چیرجنگی سوھوئی ءَ جتائیں جنگاں آئی وتی کرد سکا جپاکشی ءُ سنگینی ءَ پیش کرتگ ءُ سنگتانی میان ءَ بیسہ ودی کرتگ ءُ گل ءِ تہ ءَ یک مھکمیں سنگتے ءِ دروشم ءَ پہ وت نامے کٹ اِتگ۔ آ ناگائی کوہ، مچ ءُ بولان ءَ ترند ءُ مزنیں جنگاں یکشل ءَ سرگرم بیتگ ءُ شریں وڑے ءَ بھر زرتگ۔
جارکش ءَ گوشتگ کہ شھید شاکر جتوئی نُھ ماہ پیش گل ءَ ھوار بیتگ ءُ داں شھیدی ءَ سکا گوں سنگینی ءُ ایمانداری ءَ گل ءِ تہ ءَ وتی زمہ واریاں پیلو کنگ ءَ بیتگ۔ کسانیں وھدے ءَ آئی چہ وتی جھد، زمہ واری ءُ چہ یکشلیں کاراں ھمے پیش کرتگ کہ آئی گوں وتی لیکہ ءُ سنگتاں یک مھکمیں ھمگرنچی یے بیتگ۔
آئی ءَ گوشتگ کہ شھید ھارس مھمد شھی پنام آپتاب بلوچ، دو سال پیش یو بی اے ءَ ھوار بیتگ ءُ جتائیں وھداں آئی چہ وتی زانشت، مھکمیں جوزگ ءُ لشکری بودناکی ءَ جوانیں جاھے گپتگ۔ آئی شھری چیرجنگی ءَ دژمن ءِ تر ءُ گرد گوں ھورتی ءَ چارتگ اَنت، پہ ھال دیگ ءَ یک مھکمیں نیٹورکے ءِ پرز پیلو کرتگ ءُ پہ زمین ءِ پھازداری ءَ جوانیں کرد پیلو کنگ ءَ پد آ ناگائی، مچ، کولپور ءُ بی بی نانی ءِ وڑیں جنگاں جوانیں کرد پیلو کرتگ ءُ داں گڈی ساھت ءَ پہ وتی سرڈگار ءِ پھازداری ءَ گوں نہ ترسی ءَ دژمن ءِ دیم پہ دیمی کرتگ ءُ بے مٹیں دیمونی داتگ کہ ایشی شھیدی ءِ جاہ ءَ سر کرتگ۔
مزار بلوچ ءَ گوشتگ کہ یکبرے پد ءَ گل ناگائی کوہ ءِ شھیدانی بے دروریں دیمونیانی سر ءَ آیاں ستک شانی ندر کنت۔ آیانی بے مٹیں دیمونی ءُ گوں سرڈگار ءَ وپاداری مدام مئے رھشونی ءَ کنت۔ ما ھمے اھد ءَ کن ایں کہ شھیدانی کاروان داں بلوچستان ءِ آجوئی ءَ برجاہ بیت۔
