بلوچ نیشنل مومنٹ ( بی این ایم ) ءَ وتی شنگ کرتگیں درشانے ءَ گوشتگ کہ بی این ایم ءِ نیمگ ءَ یک مراگشے برجم دارگ بیتگ کہ اے دیوان ءَ شھید دوستا پَنجگُور ھنکین ءِ کارکناں بازیں کچے ءَ بھر زرتگ۔
آیاں تران کنان ءَ گوشتگ کہ13 نومبر ءِ روچ پما تھنا یک گوستانکے نہ اِنت بلکیں ھما روچ اِنت ما وتی شھیداں یاد کن ایں کہ آیاں چہ شھید نواب مھراب ھان ءَ بگر داں مرچی وت ءَ پہ سرڈگار ءَ کربان کنگ ءَ اَنت۔ اے روچ مارا دیمونی، نہ ترسی، جھد، لیکہ ءُ جنزگ ءِ سکین ءَ دنت۔
آئی ءَ گوشتگ کہ اے ھمے راستی ءَ پیش دار ایت کہ بلوچ راج ءَ وتی سر ببا داتگ اَنت بلے چہ سرڈگار ءَ دزکش نہ بیتگ اَنت۔ اے سرگار ءَ چونیں ھم توانمندے دستیگ کنگ ءِ کوشست ءَ بہ کنت گڑا بلوچ پہ وتی سرڈگار ءِ پھازداری ءَ جنگ کنت۔
آیاں گوشتگ کہ مرچی ھم بلوچ ءِ جھد گوں ترندی ءَ برجاہ اِنت اے ھما شھیدانی دیمونیانی برورد اِنت۔ بلوچ شھیداں ھما درچ برجاہ داشتگ ءُ اے زرمبشت مارا سر کرتگ۔ نوں اے راجی زمہ واری مئے کوپگان اِنت کہ ما ایردستی ءِ سانکلاں بہ پروش این ءُ وتی آھوکیں پدریچ ءَ آجو بہ کن ایں۔ دانکہ بلوچ سرڈگار آجو بہ بیت ءُ بلوچ یک شرپ ءِ زندگی یے بہ گوازین ایت ءُ جھان ءِ آجوئیں راجانی لڑا ھوار بہ بنت، ھمے شھیدانی لوٹ ءُ واھشتانی پیلو کنگ اِنت۔
دیوان ءِ بندات چہ راجی سوت ءُ شھیدانی یات ءَ دو دمان ءِ بے تواری ءَ کنگ بیتگ۔ دیوان ءَ ھنکین ءِ سرکماش سلتان مھمود ءَ کرتگ ءُ مھمان بی این ایم ءِ بنجاھی پتر ءِ باسک ڈاکٹر نوکاپ بلوچ ءُ بی این ایم ءِ کلانھیں باسک سنگر بلوچ بیتگ۔
دیوان ءَ چہ ایشاں ابید بی این ایم ءِ باسک شھناز بلوچ ءُ شھزادی بلوچ ءَ تران کرتگ۔
