زور بیگواھیں گنی بلوچ ءِ برات پروپیسر ابدلکیوم بادینی وی بی ایم پی ءِ زھرشانی گدان ءَ شتگ ءُ وتی برات ءِ کیس یاداشت کرتگ ءُ گوشتگ کہ گنی بلوچ ھمے سال ءِ 27 مئی ءَ چہ شال ءَ کراچی ءَ روگ ءَ بیتگ کہ چہ ھزدار ءَ پاکستانی پوج ءَ آوار جتگ ءُ بیگواہ کرتگ۔
آئی ءَ گوشتگ کہ ما پہ گنی بلوچ ءِ آجوئی ءَ درسیں ادارھانی کِر ءَ شتگ ایں بلے انگت ءَ مارا چونیں ھم ادارھے ءَ کانود ءِ رد ءَ انساپ دات نہ کرتگ چہ ایشی ءَ مئے سرجمیں کھول جنجالانی دیمپان اِنت۔
نسر اللہ بلوچ ءَگوشتگ کہ چہ گل ءِ نیمگ ءَ گنی بلوچ ءِ کیس پہ زور بیگواھیں مردماں جوڑ بیتگیں کمیشن ءُ بلوچستان سرکار ءَ دیگ بیتگ بلے انگت ءَ آ نہ آمیدگس ءَ پیش کنگ بیتگ ءُ نہ آئی کھول ءَ سرپدی دیگ بیتگ اے انسانی ھکانی تچک ءَ بگیری اِنت۔
آئی ءَ گوں سرکار ءُ ڈیھ ءِ ادارھانی سروکاں لوٹ کرتگ کہ اگاں گنی بلوچ ءِ سر ءَ چونیں ھم بھتامے ھست گڑا آمیدگس ءَ پیش کنگ بہ بیت اگاں بے میار اِنت کہ گڑا زوت یل کنگ بہ بیت۔
