بلوچ وومن پورم ءِ سروک ڈاکٹر شلی بلوچ ءَ وتی کرتگیں درشانے ءَگوشتگ کہ من یک دگہ سیاسی توارے نیشنل ڈیمو کریٹک پارٹی (این ڈی پی ) ءِ بنجاھی ڈپٹی آرگنائزر سلمان بلوچ ءِ درکانودی آوار جنی ءُ زوریں بیگواھی ءَ دلپدرد بوت آں کہ آ دوشی شال ءِ بروری دگ بولان پلازہ ءَ آوار جنگ بیتگ اَنت۔ سلمان بلوچ مدام جمھوری سیاست ءِ منوگر بیتگ ءُ پہ وتی بلوچ راج ءَ مھکمیں توارے۔ آئی زوریں بیگواھی نہ تھنا درکانودی اِنت بلکیں انسانی ھکانی ناھکیں بگیری اِنت۔
آئی ءَ گوشتگ کہ من سلمان بلوچ ءَ مدام یک باسما ءُ سنگینیں سیاسی سروکے ءِ بستار ءَ دیستگ۔ آئی دمگ ءِ چاگردی ءُ سیاسی جاورانی سر ءَ گپ ءُ تران کرتگ۔ آئی گوں دگہ دو سنگت دلیپ داس ءُ سائر بلوچ ءَ ھوار آوار جنگ بلوچستان ءِ جمھوری سیاست ءِ سر ءَ تچک ءَ ارشے زانگ بیت، پہ انوگیں بلوچ سیاست ءِ پژدر ءَ سکا بژنی گپے اِنت۔
ڈاکٹر شلی بلوچ ءَ گوشتگ کہ من ھمے لوٹ ءَ کن آں کہ سلمان بلوچ ءُ پہ آئی سنگتانی زوتیں یل کنگ ءَ دلجمی دیگ بہ بیت ءُ ھندی مردمانی اے وڑ ءَ درکانودی آوار جنی ءِ درچ زوت بند کنگ بہ بیت۔
