ھیومن رائٹس کمیشن آپ پاکستان (ایچ آر سی پی) ءَ وتی شنگ کرتگیں درشانے ءَ گوشتگ کہ ھزدار ءِ ھند زھری ءَ پاکستانی پوج چہ 15 ستمبر لشکر کشی کنگ ءَ اِنت کہ آئی بلوچ آجوئی لوٹوکانی دستیگی ءِ ھلاسی ءَ جھلی ءُ برزی کاروائی بندات کرتگ۔ ستمبر ءَ بندات بوتگیں اے لشکر کشی ءَ پاکستانی پوج ءَ جتائیں ھنداں درزنانی کچ ءَ مردم آوار جتگ ءُ دمگ ءِ راہ بستگ اَنت۔
ھیومن رائٹس کمیشن آپ پاکستان ءَ ھزدار ءِ ھند زھری ءَ پوجی کاروائیانی میان ءَ بے میاریں شھریانی سر ءَ زوراکی ءُ بیرانی ءَ بژن درشان کرتگ ءُ گوشتگ کہ پوج ءِ لشکر کشیانی میان ءَ باز بے میاریں شھری کشگ بوتگ کہ آیانی تہ ءَ کسان سالیں زھگ ھم ھوار اِنت۔
آئی گوشتگ کہ گوشتگ کہ دمگ ءَ مردمانی تر ءُ گرد ءِ سر ءَ پابندی جنگ بوتگ ءُ بازیں میتگانی سر ءَ بند آرگ جنگ بوتگ۔
ادارہ ءَ گوں سرکار ءَ لوٹ کرتگ کہ اے ویلانی بابت ءَ گوں دلجمی ءَ پٹ ءُ پول کنگ بہ بیت ءُ اھوالکاراں دمگ ءَ تر ءُ گرد کنگ ءِ موکل دیگ بہ بیت ءُ زمینی جاورانی چارگ ءِ موکل دیگ بہ بنت۔
