چہ زھری ءَ پاکستانی پوج ءِ دست ءَ بیتگیں زوراکیانی یک تامربندے ماں رسانکدر ءَ شنگ بیتگ کہ یک مردمے چہ پاکستانی پوجءِ ارش ءَ بیران بیتگیں زھگانی لاشانی کِر ءَ نشتگ ءُ گپ جنگ ءَاِنت۔
آئی ءِ گوشگ اِنت کہ اے جاہ سردارسنا اللہ زھری ءِ میتگ اِنت ما پرسے ءَ شتگ ءُ واتری آھگ ءَ بیتگ ایں کہ سرکار ءِ ھیلی کاپٹراں تیرگواری کرتگ ءُ چار زھگاں ھوار مئے شش مردم بیران ءُ دو ٹپی بیتگ۔ ما دگہ گلانی مردم نہ ایں ما سردار سنا اللہ زھری ءِ مردم اینءُ گریبیں مردم ایں۔
آئی ءَ گوشتگ کہ اے کسانیں زھگ چون کوہ ءَ شت کن اَنت ءُ سرکار ءَ تاوان دے اَنت، بس زوراکاں مئے گون ءَ زوراکی کرتگ ءُ سرکار ءِ ھیلی کاپٹراں مئے مردم شھید کرتگ اَنت ءُ ما چہ سرکار ءَ انساپ ءِ لوٹ ءَ کن ایں۔
زھری ءَ ماھے ءَ گیش اِنت کہ چہ پاکستانی پوج ءِ نیمگ ءَ زوراکی برجاہ اِنت، زھری ءَ دامگ ءُ نیٹورک ھم بند اَنت ءُ پاکستانی پوج مردماں چہ زھری ءَ ڈن روگ ءُ آھگ ءَ نیلگ ءَ اِنت۔
اے میان ءَ زھری ءِ جتا جتائیں جاھاں ریاستی پوج ءَ ڈرون ارش کرتگ ءُ ھیلی کاپٹرانی سر ءَ تیرگواری کرتگ۔ باز مردم آوار جنگ ءُ بیگواہ کنگ بیتگ۔ چہ زھری ءِ دگ ءُ نیٹورک ءِ بند بوگ ءِ سوب ءَ بازیں رپورٹ انگت دیم ءَ نہ یتکگ اَنت۔
