اکوام متھدہ ءِ ورکنگ گروپ ءَ پاکستان ءِ نام ءَ یک نمدی یے نبشتہ کرتگ ءُ بلوچستان ءَ اھوالکار ءُ انسانی ھکانی کارکن ابدلتیپ بلوچ ءُ آئی زھگ سیپ بلوچ ءِ درکانودی کوش، آئی کھول ءِ گون ءَ زوراکی ءُ انسانی ھکانی کارکن گلزار دوست ءِ دزگیری ءِ سر ءَ بژن درشان کرتگ۔
اے نمدی 13 اگست 2025 ءَ شنگ کنگ بیتگ کہ اے نمدی ءَ اکوام متھدہ ءِ جھگیراں چہ پاکستان سرکار ءَ اے ویلانی بابت ءَ پٹ ءُ پول کنگ ءِ لوٹ کرتگ۔
آئی ءَ گوشتگ کہ 24 مئی 2025 ءَ ابدلتیپ بلوچ ءَ آواران ءِ ھند مشکے ءَ گس ءَ سلاہ بندیں مردماں تیرگواری کرتگ ءُ گوشتگ۔ آئی زھگ سیپ بلوچ 28 پروری 2025 ءَ پاکستانی پوج ءَ آوار جنگ ءَ پد بیگواہ کرتگ اَت ءُ26 مارچ ءَ آئی لاش دزکپتگ۔
آئی ءَ گوشتگ کہ ابدلتیپ پیسر ءَ ھم پاکستانی پوج ءِ دست ءَ آوار جنگ ءُ آزار دیگ بیتگ۔ آئی برات راشد الی بلوچ 2011 ءَ آوار جنگءَپد کشگ بیتگ۔
اکوام متھدہ ءِ ورکنگ گروپ ءِ گوشگ اِنت کہ گلزار دوست تربت سول سوسائٹی ءِ کوآرڈینیٹر اِنت 6 جولائی 2025 ءَ چہ گس ءَ آوار جنگ بیتگ۔ آئی سر ءَ ناشرکاری ءِ بھتام جنگ بیتگ بلے آئی وارنٹ پیش نہ کرتگ۔ رند ءَ اگست ءَ آ پہ مانزمانی یل کنگ بیتگ۔
آئی ءَ گوشتگ کہ بلوچستان ءا نسانی ھکانی کارکن، اھوالکار ءُ بلوچانی بگیری ءَ درکانودی کوش، زوریں بیگواھی ءُ ناشرکاری ءِ کانودی رد ءَ کارمرز بوگ ءَ اِنت میان استمانی تک ءَ ایشی سر ءَ بژن درشان کنگ بوگ ءَ اِنت۔
اکوا متھدہ ءِ جھگیراں چہ پاکستان سرکارءَ ھپت نکانی سپاھی پیش کنگ ءِ لوٹ کرتگ کہ اود ءَ ابدلتیپ بلوچ، سیپ بلوچ ءُ راشد بلوچ ءِ کوش ءِ پٹ ءُ پول ، گلزار دوست ءِ دزگیری ءِ کانودی بنیاد ءُ ناشرکاری ءِ گر ءُ داریں کانود ءِ بابت ءَ جست ھوار بیتگ اَنت۔
آئی ءَ نمدی ءَ زور داتگ کہ پاکستان وتی میان استمانی زمہ واریانی پارست ءَ زندگی ءِ ھک، آجوئی ءِ گپ ءُ انسانی ھکانی پھازداری ءَ سدکی بہ دنت۔
