کراچی \ کیچ: پاکستانی پوج ءُ سی ٹی ڈی ءِ کارمنداں سے ورنا آوار جنگ ءَ پد بیگواہ کرتگ۔
بنشون ءِ رد ءَ بیگواھیں ورنایانی نام مھران اشرپ، رھمت ھلکو ءُ ممتاز سالھ اِنت۔ مھران اشرپ چہ کراچی ءُ رھمت ءُ ممتاز چہ کیچ ءَ آوار جنگ بیتگ اَنت۔
مھران اشرپ ءِ کھول ءِ گوشگ اِنت کہ یک اکتوبر 2025 ءَ چہ کراچی ءِ گلشن اکبال ءَ بلاک نمبر 10 ءَ سی ٹی ڈی ءِ کارمنداں آوار جتگ ءُ بیگواہ کرتگ۔ مھران آپسر، تربت ءِ جاہ منند اِنت کہ کراچی ءَ وانگ ءَ بیتگ۔
ھمے وڑ ءَ رھمت ءُ ممتاز چہ تربت ءَ جتائیں وھد ءُ جتائیں جاھاں آوار جنگ بیتگ اَنت۔ رھمت ءَ رکشہ گوں بیتگ ءُ چہ زور بازار تربت ءَ 5 اکتوبر ءَ آوار جنگ ءُ بیگواہ کنگ بیتگ۔ممتاز سالھ 2 اکتوبر ءَ چہ تربت، گلشن آباد ءَ پاکستانی پوج ءَ آوار جتگ ءُ بیگواہ کرتگ۔
