آواران: چہ اورماڑہ ءَ پاکستانی پوج ءِ دست ءَ زور بیگواہ کنگ بیتگیں ورنا سگیر اھمد ءُ اکرار بلوچ ءِ کھول ءِ نیمگ ءَ پہ آیانی زوریں بیگواھی ءِ بگیری ءَ زھرشانی کنگ بیتگ۔
زھرشانی روانک ءَ کھول ءَ ھوار جتائیں بھرگاں سیادی داروکیں مردماں بازیں کچے ءَ بھر زرتگ۔ زھرشانی کنوکیں مردماں زور بیگواھیں مردمانی اکس ، بینر ءُ پلے کارڈ دستاں بیتگ ۔
زھرشانی کنوکیں مردماں پہ زور بیگواھیں مردمانی آجوئی ءُ زوریں بیگواھیانی بند کنگ ءِ بگیری ءَ اوگام جتگ۔
آیاں تران کرتگ ءُ گوشتگ کہ سگیر اھمد ء گلام کادر ءُ اکرار ء جنگیان پاکستانی پوج ءَ یازدہ جون ءَ چہ اورماڑہ ءَ آوار جتگ ءُ بیگواہ کرتگ اِنت کہ داں مرچی آیانی ھچ وڑیں ھال نیست۔ سے ماہ ءِ گوزگ ءَ پد ھم آمیدگس ءَ پیش کنگ نہ بیتگ اَنت۔
آیاں گوشتگ کہ مئے گوں سرکار ءَ لوٹ ھمیش اِنت کہ اگاں مئے مردمانی سر ءَ چونیں بھتامے ھست گڑا وتی جند ءِ آمیدگس ءَ پیش بہ کن ءُ سزا بدے اگاں بے میار اَنت گڑا زوت یل کنگ ءُ گوں کھولاں انساپ کنگ بہ بیت۔
چوش کہ زور بیگواھیں سگیر اھمد ءُ اکرار بلوچ ءِ کھول ءَ چہ ایشی ءَ پیش ھم شال ءَ زھرشانی کرتگ ءُ اسلام آباد ءَ ھم برجاھیں زھرشانی ءَ بھر زرتگ۔
