لندن : ورلڈسندھی کانگریس ءِ ھپتاد ءُ سیمی میان استمانی دیوان یونیورسٹی آپ ویسٹ منسٹڑ ھیروکیمپس ءَ برجم دارگ بیتگ۔ اے دیوان ءَ سیاسی ءُ انسانی ھکانی کارکن، لبزانکار ءُ اھوالکاراں ھوار آدگہ بھرگاں سیادی داروکیں مردماں بھر زرتگ۔ اے دیوان ءَ بی این ایم ءِ کلانھیں باسک ءُ زرمبش ءِ اھوالکار جاسم بلوچ لوٹگ بیتگ کہ آئی ءَ دیوان ءَ بھر زرتگ۔
جاسم بلوچ ءَ بلوچستان ءِ جاورانی سر ءَ تران کرتگ ءُ گوشتگ کہ بلوچستان چہ کرناں یک آجو ءُ وتواکیں ڈیھے بیتگ۔ بلے 1839 ءَ برتانیہ ءَ ھان کلات ءِ سر ءَ ارش کرتگ ءُ دستیگ کرتگ۔ 1947 ءَ بلوچستان یکبرے پد ءَ آجو بیتگ کہ مارچ 1948 ءَ پاکستان ءَ گوں وتی پوج ءِ زور ءَ دستیگ کرتگ، بلے بلوچ آئی زورگپتی ءَ نہ من ایت۔
جاسم بلوچ ءَ گوشتگ کہ بلوچ نیشنل موومنٹ ھمے گوستانکی جھدے ءِ درچ اِنت کہ آ پہ بلوچ راجی آجوئی، پجار ءُ پہ راجی وتواکی ءَ جھد کنگ ءَ اِنت۔
آئی ءَ گوشتگ کہ ھزارانی کچ ءَ بے میاریں بلوچ زور بیگواہ کنگ بیتگ اَنت۔ چہ مچی مانشانی دزکپگ ءَ ریاستی زوراکیانی راستی پاشک بیتگ۔ مئے مڈی چہ سی پیک، ریکوڈک ءُ سیندک ءِ وڑیں شوربندیانی رد ءَ لٹ ءُ پل کنگ بوگ ءَ اَنت۔
جاسم بلوچ ءَ بی این ایم ءِ سروک زبیر بلوچ ءُ نسار بلوچ ءِ شھیدی ءِ مسال داتگ ءُ گوشتگ کہ اے زوراکیانی گڈی سیمسر اِنت پہ ھک ءَ توار چست کنوکیں مردم زوراکیانی آماچ کنگ ءُ کشگ بوگ ءَ اَنت، بلے بلوچ راج سر جھل نہ کنت۔
