بلوچ یکجہتی کمیٹی (بی وائی سی) ءَ وتی شنگ کرتگیں درشانے ءَ گوشتگ کہ پاکستان ءِ دستیگ کرتگیں کشمیر ءَ برجاھیں ریاستی زوراکی ءُ آزاردھی کاروائیاں گوں ترندیں دانکاں ایر جن ایں کہ اود ءَ پاکستانی پوج ءَ جوائنٹ اوامی ایکشن کمیٹی ءِ پرایمنیں زھرشانی کنوکانی بگیری ءَ زوراکی کرتگ۔
آئی گوشتگ کہ کشمیر ءَ بیوکیں زھرشانی یک لس مردمانی زرمبشتے کہ شھری سیاسی ھک، کانود سازی ءِ رد ءَ وانگ، جاندراھی ءُ آدگہ بنکی آسراتی ءُ آجوئی ءِ ھک ءَ لوٹ کنگ ءَ اَنت۔
آئی گوشتگ کہ پاکستان ریاست ءَ گوں کشمیریاں گپ ءُ تران نہ کرتگ ءُ بلکیں زوراکی کرتگ۔ ایشی آسر ءَ باز زھرشانی کنوک بیران ءُ باز ٹپی بوتگ ءُ دمگ پنچ روچ اِنت کہ یکشل ءَ سرجم ءَ بند اِنت کہ ریاست ءِ زوراکی ءُ مھلوک ءِ جیڑھانی گیش ءُ گیوار نہ کنگ ءِ منانک اِنت۔
آئی ءَ گوشتگ کہ بلوچ یکجہتی کمیٹی گوں کشمیری مھلوک ءَ یکجھتی درشان کنت ءُ زوت ریاستی زوراکی ءِ ھلاس کنگ ءِ لوٹ کرتگ۔
آئی ءَ گوشتگ کہ گل گوں جھانی انسانی ھکانی گلاں لوٹ کنت کہ آ زوت اے بابت ءَ گامگیج بہ زور اَنت دانکہ کشمیری مھلوک ءِ جان ءُ آجوئی ءَ دلجمی بہ بدے اَنت ، ریاست ءَ آئی زوراکیانی سر ءَ جست بہ کن اَنت۔ کشمیری مھلوک ءِ بنکی لوٹ منگ بہ بنت
