اسلام آباد ءَ برجاھیں زھرشانی نندانک ھپتاد ءُ سیمی روچ ءَ ھلاس کنگ بیتگ
اسلام آباد ءَ پہ بلوچ یکجھتی کمیٹی ءِ سروک ءُ زور بیگواھیں مردمانی آجوئی ءَ برجاھیں زھرشانی نندانک ءِ ھپتاد ءُ سیمی روچ ءَ ھلاس کنگ ءِ جار جنگ بیتگ۔
اے زھرشانی نندانک ءَ بی وائی سی ءِ بندیگیں سروک ڈاکٹر ماہ رنگ بلوچ ءِ گھار نادیہ بلوچ ءُ آدگہ زور بیگواھیں مردمانی کھول ءُ بی وائی سی ءِ باسک ساڑی بیتگ اَنت ۔ پہ کھولانی ھمدردی درشان کنگ ءَ انسانی ھکانی کارکن، نودربر ءُ آدگہ مردماں بازیں کچے ءَ بھر زرتگ۔
آیانی گوشگ اِنت کہ پہ اے زھرشانی ننداک ءِ ھلاس کنگ ءَ راجدوستیں سروک میر واجہ مھمد الی تالپور ءَ لوٹ کرتگ ءُ چہ ایشی ءَ پد انسانی ھکانی کارکن ءُ وکیل زینب ایمان مزاری ءُ آدگہ ھم مردماں پہ زھرشانی ءِ ھلاس کنگ ءَ لوٹ کرتگ۔
آیانی گوشگ اِنت کہ مئے زھرشانی ءِ مول بی وائی سی ءِ سروک ڈاکٹر ماہ رنگ بلوچ ءُ آئی سنگتانی درکانودی دزگیری ءُ سرجمیں بلوچستان ءَ زوریں بیگواھیانی بگیری ءَ توار چست کنگ بیتگ۔
آیانی گوشگ اِنت کہ ما چہ اد ءَ وتی زھرشانی ءَ ھلاس کنگ ءَ ایں بلے زوراکیانی بگیری ءَ مئے جھد ھلاس نہ بیت۔ ما گوں پر ایمنی ءَ وتی جھد ءَ برجاہ دار ایں۔
