کراچی ءَ پہ زور بیگواھیں مردمانی آجوئی ءَ کراچی پریس کلب ءِ دیم ءَ برجاھیں زھرشانی نندانک ءَ سی ءُ شش روچ سرجم بیتگ کہ انگت برجاہ اِنت۔ زور بیگواھیں زاھد الی پت ابدلھمید جگر ءِ نادراہ اِنت بلے انگت ءَ زھرشانی نندانک ءَ ساڑی اِنت۔
چہ زھرشانی نندانک ءَ ابدُلھمید بلوچ ءَ تران کرتگ ءُ گوشتگ کہ منی زھگ ءِ زوریں بیگواھی ءَ پنجاہ ءُ شش روچ اِنت بلے آئی ھچ وڑیں ھال نیست کہ چون ءُ کج ءَ اِنت۔
آئی ءَ گوشتگ کہ من ھمے لوٹ ءَ کن آں کہ زاھد بلوچ ءَ ھوار چہ کراچی ءَ چنچو مردم بیگواہ کنگ بوتگ درس یل کنگ بہ بنت۔ بلوچ راج مئے گون ءَ ھمراھداری بہ کنت ءُ پہ مئے زھگانی آجوئی ءَ توار چست بہ کن اَنت۔
ابدلھمید بلوچ ءَ گوشتگ کہ من وت ھم باز نادراہ آں بلے پہ زھگ ءَ لاچار آں من گس ءَ نشت نہ کن آں۔ مارا ماھے ءَ چہ گیش اِنت کہ ما وتی زھرشانی برجاہ داشتگ۔
آئی ءَ گوشتگ کہ زوریں بیگواھی تھنا یک گسے ءِ جیڑہ نہ اِنت چہ ایشی سرجمیں راج سانمند اِنت۔ من ھمے اوست ءَ داراں کہ بلوچ راج مئے ھمراھداری ءَ کنت ءُ پہ بیگواھیں مردمانی آجوئی ءَ توار چست کنت۔
