کراچی ءَ پہ زور بیگواھیں مردمانی پد جنگ ءَ برجاھیں زھرشانی گدان ءَ کراچی پریس کلب ءِ دیم ءَ بیست ءُ چار روچ سرجم بیتگ کہ انگت ءَ برجاہ اِنت۔ اے وھد ءَ زور بیگواھیں زاھد الی بلوچ، سرپراز بلوچ، شیراز ءُ سیلان ءِ کھول زھرشانی گدان ءَ نشتگ اَنت۔
زھرشانی گدان ءَزور بیگواھیں مردمانی اکس، بینر ءُ پلے کارڈ ایر کنگ بیتگ اَنت کہ ھمک روچ سیاسی ءُ چاگردی کارکن آدگہ مردم پہ کھولانی ھمدردی درشان کنگ ءَ گدان ءَ پیداک اَنت۔
زھرشانی کنوکیں مردمانی گوشگ اِنت کہ مئے زھگ چنچو وھد اِنت چہ ریاستی ادارھانی دست ءَ بیگواہ کنگ بیتگ اَنت انگت ءَ مارا آیانی بابت ءَ ھچ وڑیں سرپدی دیگ نہ بیتگ۔
آیانی گوشگ اِنت کہ زوریں بیگواھی ءِ رنج تھنا گوں بیگواھیں مردمانی جند ءَ بندوک نہ اِنت بلکیں سرجمیں کھول ءَ رنجانی دیمپان کنت۔ زوریں بیگواھی ڈیھ ءِکانود ءُ انسانی ھکانی بگیری اِنت۔
آیاں گوں سرکار ءَ لوٹ کرتگ ءُ گوشتگ کہ مئے زور بیگواھیں زھگ آمیدگس ءَ پیش کنگ بہ بنت ءُ مئے گون ءَ انساپ کنگ بہ بیت۔
