ھزدار ءِ ھند کوشک ءِ جاہ منند سُگرا بلوچ ء ابدلکریم ءَ گوں وتی کھول ءِآدگہ مردمانی ھواری ءَ ھزدار پریس کلب ءَ پریس کانپریس کرتگ ءُ گوشتگ کہ من گوں وتی کستریں گھار ءَ چہ گس ءَ درکپتگ ءُ دیم پہ درزی ءِ دکان ءَ روگ ءَ بیتگ آں کہ منی ھمساھگ اسامہ کدرانی ء ھاجی امر من ءَ چہ گسانی نزیک ءَ آوار جتگ ءُ پہ زور گاڑی ءَ سوار کرتگ۔
آئیءَ گوشتگ کہ آوار جنگ ءَ پد اسامہ من ءَ سکا آزار داتگ ءُنشہ کنوکیں چیز وارینتگ ءُ منی چم بستگ اَنت ءُ منی گون ءَ زوراکی کرتگ۔
آئی گوشگ اِنت کہ من یک چورھیں جنکے آں مرچی منی گون ءَ اے کار بیتگ اے بلکیں بلوچ راجءِ گیرتءِ جیڑہ اِنت۔ اگاں منی گون ءَ انساپ نہ بوت گڑا من مرگ ءَ گچین کن آں، چہ اے وڑیں زند گوازینگ ءِ جاہ ءَ من وت ءَ کش آں بلے زوراکی ءَ اوپار نہ کن آں۔
سُگرا بلوچ ءِ مات ءِ گوشگ اِنت کہ ما نزوریں مردم ایں ءُ مارا ھچ آسر ءَ نیست، من وتی پریات ھدا ءِ دربار ءَ سر کرتگ چے کہ مئے گون ءَ بیتگ ھدا زوراکاں جست بہ کنت۔
کھول ءِ آدگہ مردمانی گوشگ اِنت کہ سُگرا بلوچ چہ آوار جنگ ءَ لھتیں ادار ءَ پد یل کنگ بیتگ کہ آئی جاور سکا ناگیگ بیتگ اَنت۔ اسامہ یک توانمندیں مردمے آ وت ءَ چہ کانود ءَ پھریزگ ءِ جھد ءَ کنت۔
