اسلام آباد ءَ پہ بلوچ یکجھتی کمیٹی ءِ سروکانی یل کنگ ءُ زوریں بیگواھیانی بند کنگ ءِ درگت ءَ برجاھیں زھرشانی ءَ سی ءُ نُھ روچ سرجم بیتگ کہ انگت ءَ برجاہ اِنت۔
زھرشانی کنوکیں مردمانی گوشگ اِنت اے سی ءُ نُھ روچانی میان ءَ اد ءَ نشتگیں کسانیں زھگ ءُ پیرزالیں ماتاں ھور ءُگوات ، موسم ءِ جنجالاں ابید ریاستی زوراکی ھم دیستگ اَنت بلے انگت ءَ پر ایمن اَنت پہ وتی لوٹاں زھرشانی ءَ نشتگ اَنت۔
آیانی گوشگ اِنت کہ مئے زھرشانی پہ سرجمیں بلوچستان ءِ ریاستی زوراکیانی آماچیں مردماں اِنت، اگاں مرچی مئے توار دارگ بوتگ باندا سرجمیں بلوچستان ءِ مردم چہ ریاست ءَ بے اوست بنت۔
آیاں گوشتگ کہ ما گوں سرجمیں شھری، اھوالکار، انسانی ھکانی کارکن ءُ گوں میان استمان ءَ لوٹ کن ایں کہ آ بلوچستان ءَ زوریں بیگواھی، درکانودی کوش ءُ سیاسی توارانی دارگ ءِ بگیری ءَ گامگیج زورگ ءَ وتی زمہ واریاں پیلو بہ کن اَنت۔
آیاں گوشتگ کہ ما ھمے لوٹ ءَ کن ایں ڈاکٹر ماہ رنگ بلوچ گوں بی وائی سیءِ سروکاں زوت یل کنگ بہ بیتءُ زوریں بیگواھیانی درچ زوت بند کنگ بہ بیت دانکہ بلوچستانءِ مردم گوں ایمنی ءَ زند بہ گواین اَنت۔
