بلوچ یکجھتی کمیٹی ءِ سروک سمی دین ءَ چہ اسلام آباد زھرشانی نندانک ءَ وتی شنگ کرتگیں تامربندے ءَ گوشتگ کہ مئے گل ءِ سروکانی دزگیری ءَ پنچ ماہ سرجم بوتگ۔ بندات ءَ تھری ایم پی او ءِ رد ءَ آیانی سر ءَ دروگیں بھتام جتگ ءُ دزگیر کرتگ ءُ داں سے ماہ ءُ پازدہ روچ ءَ زندان ءَ بندیگ کنگ بوتگ اَنت۔
آئی گوشتگ کہ گوستگیں 45 روچ اِنت کہ آ جتاھیں پیشیاں پد ریمانڈ ءَ دیگ بوگ ءَ اَنت۔انوں یکبرے پد ءَ آمیدگس ءَ پیش کنگ بوتگ اَنت ءُ پد ءَ ھم پہ پازدہ روچ ءِ ریمانڈ ءَ زندان ءَ دیم دیگ بوتگ اَنت۔
سمی دین ءَ گوشتگ کہ اے پنچ ماھانی میان ءَ مئے سنگتاں زندان ءِ آزار ءُ جنجال اوپار کرتگ اَنت گوں ایشی ءَ ھوارریاستی نزام ھم پاشک کرتگ کہ آ راھبند ءُ کانود ءَکجام وڑ ءَ کار گرگ ءُ مئے سنگتاں نشانگ کنگ ءَ اِنت۔ رسانکدر ءِ پڑ ءَآیانی سر ءَ جتا جتائیں بھتام جنگ بیتگ بلے پنچ ماہ ءِ گوزگ ءَ ابید ریاست ءَ منانکے ھم پیش کرت نہ کرتگ۔ چہ ایشی ءَ ھمے پدر بیت کہ مئے سنگت بس پہ سیاست ءِ بنیاد ءَ زندانی کنگ بیتگ اَنت دانکہ آ بلوچ یکجھتی کمیٹی ءِ ایمنیں جھد ءَ بہ دار اَنت۔ ھما تواراں بدار اَنت کہ آ ریاستی زوراکیانی پژدر ءَ چست بیتگ اَنت۔
آئی ءَ گوشتگ کہ مئے سنگت آمیدگس ءَ پیش کنگ بیتگ اَنت آیانی توکل ءَ ھمے پیش داشتگ کہ آ زوراکیانی دیم ءَ سر جھل نہ کن اَنت۔ اے پنچیں ماھانی میان ءَ نہ مئے زرمبشت نزور بیتگ ءُ نہ مئے زندان ءَ بندیگیں سنگتانی توار دارگ بیتگ بلے مرچی ھم مئے توار چہ پیسر ءَ گیش ترند ءُ مھکم اِنت۔ ریاست ءِ آمیدگس ءِ نزام سرجم ءَ پاشک بیتگ۔
سمی دین ءَ گوشتگ کہ آمیدگس ءَ آ تانمندانی کمکار جوڑ بوگی نہ اِنت کہ آ وتی تبءِ پیسلہ ءَ بہ کن اَنت۔ اگاں آمیدگس راستی ءَ دیم ءَ بیار ایت نہ تھنا انساپ بیت بلکیں وتی ھستمان ءَ ھم مھکم کنت۔
