چہ کراچی ءُ نوشکے ءَ نودربرے ءَ ھوار دو ورنا پاکستانی پوج ءَ آوار جتگ ءُ بیگواہ کرتگ۔
اھوالکار ءِ رد ءَ چہ کراچی ءَ زور بیگواھیں ورنا ءِ نام مسلم داد ء ساھب داد اِنت کہ آواران ءِ ھند مشکے ءِ جاہ منند اِنت ءُ کراچی یونیورسٹی ءِ پلسپہ ءِ نودربرے۔ زی بیگاہ ءِ ھپت ءَ چہ یونیورسٹی ءِ مزنیں دروازگ ءِ دپ ءَ پاکستانی پوج ءَ آوار جتگ ءُ بیگواہ کرتگ۔
دومی نیمگ ءَ پاکستانی پوج ءَ چہ نوشکے ءَ ھپیز اللہ نامیں ورنایے آوار جتگ ءُ بیگواہ کرتگ۔ بیگواھیں ھپیز اللہ ء پیر مھمد نوشکے ءِ ھند کازی آباد ءِ جاہ اِنت کہ پاکستانی پوج ءَ 26 جولائی ءَ چہ گس ءَ آوار جتگ ءُ بیگواہ کرتگ۔
دوئیں ورنایانی بیگواھی ءِ گپ بلوچ یکجھتی کمیٹی ءَ راست کرتگ اَنت ءُ آیانی آجوئی ءِ لوٹ کرتگ۔
