کراچی : بلوچ یکجھتی کمیٹی ءِِ سروک سمی دین ءَ چہ کراچی پریس کلب ءَ پریس کانپریس کرتگ ءُ بلوچستان ءَ ریاست ءِ نیمگ ءَ انسانی ھکانی لگمالی ءِ بابت ءَ بی وائی سی ءِ شش ماھی رپورٹ پیش کرتگءُ بی وائی سی ءِ سروکانی ناھکیں دزگیری ءِ بگیری ءَ اسلام آباد ءَ کھولانی زھرشانی ءَ انتزامیہءِ زوراکیانی سر ءَ گپ جتگ۔
آئی ءَ گوشتگ کہ بی وائی سی ءِ رد ءَ بلوچستان ءَ سال 2025 ءِ اولی شش ماھاں بزاں جنوری داں جون ءَ 752 مردم زورببگواه کنگ بیتگ که چه اِیشاں 181 مردم کمیں وھد ءَ پد یل کنگ بیتگ ، ھمے وڑ ءَ 25 مردم آوار جنگ ءَ پد کشگ بیتگ ءُ آدگه 546 مردمانی بابت ءَ انگت ءَ آیانی کھولاں ھچ وڑیں سرپدی دیگ نه بیتگ ءُ آ بیگواه اَنت. چه زوربیگواھیں مردماں گیشتریں کیس مکران ءِ اَنت ءُ گیشتریں مردم پرنٹیئر کور بزاں ایپ سی ءَ بیگواه کرتگ اَنت۔
آئی ءَ گوشتگ که اے ششیں ماھاں 117 مردم درکانودی کشگ بیتگ که چه اِشاں گیشتریں دروگیں میڑانی بیتگ اَنت که زوربیگواھیں مردم کشگ ءُ لاش چگل دیگ بیتگ اَنت ، کشگ بیتگیں مردماں ورنا ، نودربر ءُ سیاسی کارکن ھوار اَنت ، زوربیگواه کنگ بیتگیں ھمک مردم آزارجاھاں گنتریں جانی ءُ سسائی آزارانی نشانگ کنگ بیتگ اَنت ، چه درکانودی کشگ بیتگیں مردمانی لاشاں آزارانی نشان گندگ بیتگ اَنت۔
آئی ءَ گوشتگ کہ چہ ایشی ءَِ ابید گپ ءِ آجوئی۔ پر ایمنیں زھرشانی، ترد ءُ گردانی سر ءَِ پابندی جنگ بیتگ۔ بی وائی سی ءِ وڑیں سیاسی ءُ انسانی ھکانی ادارہ نہ تھنا ناشرکار گوشگ بوگءَ ا۔نت بلکیں آئی کمکار ءُسروکانی بگیری ءَایپ آئی آر کنگ ءُ تھری ایم پی اوءُ پورتھ شیڈول ءِ وڑیں کانود رد کار گرگ بوگ ءَ اَنت۔ اےدرسیں گپ ھمے چیز ءِ منانک اَنت کہ ریاست وتی زوراکیاں جائز لیکگ ءُ کانود ءُ چو سلاہ ءِ پیم ءَ کار گرگ ءَ اِنت۔
