اسلام آباد ءَ بلوچ یکجھتی کمیٹی ءِ سروکانی یل نہ کنگ ءِ بگیری ءَ برجاھیں زھرشانی نندانک ءَ بی وائی سی ءِ سروک ڈاکٹر ماہ رنگ بلوچ ءِ گھار نادیہ بلوچ ءَ پریس کانپریس کرتگ ءُ گوشتگ کہ ما یکبرے پد ءَ چه بلوچستان ءَ وتی پریات زرتگ ءُ ھمے اوست ءَ پاکستان ءِ بنجاھی شھر اسلام آباد ءَ اتکگ ایں که مئے توار اِشکنگ به بیت۔
آئی ءَ گوشتگ که مرچی بلوچستان رسانکدری رد ءَ یک کور چاتے جوڑ کنگ بیتگ که اود ءَ زوراکی ءِ بگیری ءَ ھر وڑیں توار بند کنگ بنت ، ما چه ھما دلیر ءُ تمردیں سیاسی کارکنانی نیمگ ءَ په گپ کنگ ءَ اتکگ ایں که آ تھنا ھمے میار ءَ زندان ءَ بند کنگ بیتگ که اَنت که آیاں په بلوچستان ءَ انساپ ءُ ایمنی ءِ لوٹ کرتگ۔
نادیه بلوچ ءَ گوشتگ که اِد ءَ ڈاکٹر ماه رنگ بلوچ ، شاجی سبگت الله بلوچ ، بیبگر بلوچ ، گلزادی بلوچ ، بیبو بلوچ ، ماما گپار بلوچ ءُ اِمران بلوچ ءِ کھول اتکگ ءُ اے زھرشانی گدان ءَ ساڑی اَنت ، ما ھمے واستا زھرشانی کنگ ایں که پاکستان ءِ مردم ءُ میان استمان اے گپ ءَ به زانت که بلوچستان ءَ نه تھنا نا انساپی ءُ آسراتی ءِ کمے اِنت بلکیں اود ءَ مردم په اے زوراکیانی بگیری ءَ توار چست کنگ ءَ هم ایمن نه اَنت۔
آئی ءَ گوشتگ که بی وائی ءِ سروک یکبرے تھری ایم پی او ءِ رد ءَ در کانودی دزگیر کنگ بیتگ اَنت ، ماھے ءَ پد آیانی کیس مزن آمیدگس ءَ برگ بیتگ ءُ چه ایشی ءَ پد آیانی بندیگ بوگ انگت برجاه بیتگ ، ھمے وڑ ءَ 22 جون ءَ آیانی 3 ایم پی او ءِ ھلاس بیتگ بلے چه ایشی ءَ اَبید هم آ انگت دگه 20 روچ زندان ءَ دارگ بیتگ اَنت ، 8 جولائی ءَ اَبید ءِ کھولانی ھال دیگ ءَ چه ھده زندان ءَ ناشرکاری ءِ رد ءَ آمیدگس ءَ پیش کنگ بیتگ اَنت ءُ دروگیں ایپ آئی آر ءِ رد ءَ په ده روچی ریمانڈ ءَ تانه ءَ بند کنگ بیتگ اَنت ، مرچی 9 روچ گوستگ ءُ مارا آیانی گندگ ءِ موکل دیگ نه بیتگ۔
نادیه بلوچ ءَ گڈی ءَ ڈاکٹر ماه رنگ ءُ بی وائی سی ءِ آدگه سروکانی زوتیں یل کنگ ءُ بلوچستان ءَ زوربیگواهی ءُ سیاسی کارکنانی دزگیر کنگ ءِ درچ ءِ زوت ھلاس کنگ ءِ لوٹ کرتگ۔
