بلوچ یکجھتی کمیٹی ( بی وائی سی ) ءِ جارکش ءَ ماں رسانکدر ءَ وتی شنگ کرتگیں درشانے ءَ گوں بی وائی سی تربت ھنکین ءَ بندوکیں چاگردی کارکن ءُ سول سوسائٹی کیچ ءِ اگده دار گلزار دوست ءِ گس ءِ سر ءَ سی ٹی ڈی ءِ بیڑ برگ ءُ آئی زوربیگواه کنگ ایر جتگ ءُ گوشتگ که آ مرچی آمیدگس ءَ پیش کنگ بیتگ ءُ آئی سر ءَ بازیں کچے ءَ دروگ ءُ سیاسی بھتام جنگ بیتگ که اے یک تچکیں کلوھے که بلوچستان ءَ هر کس انساپ ، انسانی ھک ءُ زوربیگواھی ءِ بگیری ءَ توار چست کنت آ ریاستی زوراکی ءِ نشانگ کنگ بیت۔
آئی ءَ گوشتگ که گلزار دوست یک ایمن ءُ مردمی توارے که داں دراجکشیں وھدے ءَ زوربیگواھیں مردمانی کھول ، چه درکانودی کوش ءَ سانمندیں مردم ءُ ریاستی زوراکی ءِ بگیری ءَ توار چست کنگ ءَ بیتگ ، آئی ءِ جھد چوناھا راھبندی ، سیاسی ءُ انسانی ھکانی رد ءَ بیتگ ، آئی میار بس ھمیش اِنت که آ بے توار بوگ ءِ جاه ءَ گوں زوراکیاں آماچیں مردماں ھوار بیتگ ءُ اے گپ ریاستی ادارھاں سگ اِت نه کرتگ۔
بی وائی سی ءَ گوشتگ که بلوچستان ءَ سی ٹی ڈی ءِ کرد نه ایوک ءَ جیڑھ ودی کنگ بلکیں بنامی اِنت ، اے اداره بس ھما مردمانی بگیری ءَ کارمرز بوگ ءَ اِنت که راست گوشی ءُ گھگیری ءِ سیاست ءِ سر ءَ اوشتوک اَنت ، گسانی سر ءَ درکانودی بیڑ برگ ، مردمانی زوربیگواه کنگ ءُ دروگیں بھتام جنگ ءُ آیانی ایر جنگ ءِ جھد چوناھا بلوچ راج ءِ بے توار کنگ ءِ یک یکشلیں درچے۔
بی وائی سی ءَ وتی درشان ءِ گڈی ءَ گلزار دوست ءِ زوت ءُ تچک ءَ یل کنگ ءِ لوٹ کرتگ ءُ گوشتگ که ما اے گپ ءَ تچک ءَ گوش ایں که بلوچ راج ءِ توار گوں زوراکی ، بیھار دیگ یا گوں دروگیں کیساں بند کنگ نه بیت ، ریاست اگاں ھمے سرپد بیت که گوں سیاسی کارکنانی نشانگ کنگ ءَ بلوچستان ءِ توار بند کنگ بیت گڑا اے آئی ءِ مزنیں ردی اِنت ، ما ھر پیم ءَ گلزار دوست ءِ گون ءَ همراه ایں ءُ داں آئی ءِ آجوئی ءَ توار چست کن ایں۔
