بلوچ نودربر گل ( بی ایس او) ءِ بنجاھی جارکش ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایس او بیوٹمز بنزہ ءِ باسک ادنان رند گوستگیں روچاں دزانی تیرگواری ءَ شھید بوتگ۔ ادنان رند گوں وتی کھول ءِ ھواری ءَ چہ دو دریا ءَ درکپتگ کہ دزاں پہ لٹ ءُ پل ءِ نیمون ءَ داشتگ اَنت، آیانی موبائل ءُ گرانھادیں سامانی پلگ ءَ پد گوں آئی ھمرائیں جنیناں بے ادبی کرتگ ھمے سوب ءَ آ گوں دزاں گر ءُ چیل بوتگ، دزاں تیرگواری کرتگ ءُ شھید کرتگ۔
جارکش ءَ گوشتگ کہ ادنان رند گل ءِ یک لیکھی ءُ جپاکشیں باسکے بوتگ، آ انوں گل ءَ ھوار بوتگ ءُ جتائیں وھداں باز کار ئے کرتگ۔ گل چہ یک جپاکشیں ھمبل ءُ بلوچ راجی زرمبشت چہ یک نہ ترسیں کارکنے ءَ زبھر بوت۔ آئی شھیدی ءَ ھما جاہ کہ ھالیگ بوتگ آ جاہ پر کنگ نہ بیت۔
آئی گوشتگ کہ گل گوں سند سرکار، پولیس ءُ واکداراں لوٹ کنت کہ شھید ادنان ءِ کشندھاں در بہ گیج ایت ءُ آیاں دزگیر بہ کنت ءُ سزا بہ دنت اگاں نہ گل تیوگیں ڈیھ ءَ زھرشانی کن ایں۔
