شال چہ بلوچ اسٹوڈنٹس ایکشن کمیٹی ءِ نیمگ ءَ شال ءَ سائنس پیسٹیول برجم دارگ بیتگ۔ سائنس پیسٹیول ءِ تہ ءَ بنجاھی کماش ءَ ھوار آدگہ بنجاھی سنگتءُ شال ءِ وانگجاہ، لینگوئج سنٹر ءُ وانگی اکیڈمی ءُآدگہ زھگ ءُ ورنا ءُ استاداں بھر زُرتگ۔
مراگش ءَ جتائیں سائنسی ءُ زانشتی بھر ھوار بوتگ اَنت۔ چوش کہ سائنس ءُ ٹکنالوجی، پزکس، کیمسٹری، بائیوٹکنالوجی، بائیوکیمسٹری ءِ پڑانی سر ءَ پریزنٹیشن، سائنسی پڑ ءُ سائنس ءُ دومی بساک ءِ ماں سائنسی پِڑ ءَ جھد ءُ بلوچ نودربر ءِ سر ءَ ڈاکومنٹری پیش دارگ ءُ سائنس ءِ ارزشت ءِ سر ءَ کسمانک ھوار بوتگ اَنت۔
آئی گوشتگ کہ مراگش ءَ سائنسی پِڑانی سر ءَ پنچ پریزنٹیشن چو اے وڑ ءَ پیش کنگ بوتگ اَنت، کیمسٹری ءِ سر ءَ جلیل بلوچ، بائیوکیمسٹری ءِ سر ءَ سارہ بلوچ، پزکس ءِ اُزیر بلوچ، بائیوٹکنالوجی ءِ بانک بلوچ ءُ سائنس ءُ ٹکنالوجی ءِ سر ءَ اتیک بلوچ ءَ وتی ھیال پیش کرتگ ءُ سائنس ءِ پِڑانی پجار، آیانی دپتر ءُ انسانی آسراتی ءَ پہ کارمرزی ءَ ھوار بلوچ ورنایانی ماں سائنسی پِڑاں وانگ ءِ الّمی ءِ سر ءَ تران کُرتگ۔
آئی گوشتگ کہ دیوان ءَ دو سرھالانی سر ءَ تامربند پیش کنگ بوتگ یکے سائنس، سائنس ءِ پڑ ءُ ھستیں وھد ءَ کارمرزی ءُ زورت ءِ سرھال بوتگ ءُ دومی بساک ءِ جھد ءُ سائنسی پِڑ ءَ بلوچ نودربر ءُ ورنایانی ھُبناکی ءِ درنگازگ ءِ بابت ءَ بوتگ اَنت۔ اے تامربندانی تہ ءَ سائنسی پِڑ ءُ آیانی ھستیں دور ءَ لوٹ ءُ زورت ءِ دلجمی ءَ گوں پیش کنگ بوتگ دانکہ زھگ ءُ ورنا سائنس ءُ سائنسی پِڑاں نہ تھنا سرپد بہ بنت بلکیں آیاں بہ وان اَنت ءُ وتی چاگرد ءُ راج ءِ پہ گھتری ءَ کارمرز بہ کن اَنت۔
پیسٹیول ءِ مکسد بلوچ زھگ ءُ ورنایانی تہ ءَ سائنسی ھوالہ ءَ ھُبناکی آرگ ءُ آیاں ساچشتی، بودناکی ءُ نوکیں سائنسی سازگاری ءِ تہ ءَ سکین دیگ ءُ راہ پیش دارگ بیتگ دانکہ بلوچ زھگ ءُ ورنا ھکیگیں دروشم ءَ سائنس بہ وان اَنت ءُ وتی بودناکی ءَ چہ نوک نوکیں ساچشت بہ کن اَنت ءُ جھان ءِ گاماں گوں گام جنگ ءِ تگ ءَ ھوار بہ بنت۔
آئی گوشتگ کہ اے دور ءَ کہ انسان ءَ ھما چیریں راز درگیتکگ ءُ سائنسی پٹ ءُ پول، پریکٹیکل کاراں ءُ آزمودگاں چہ نوک نوکیں ھیال زُرتگ ءُ انچیں ازباب ءُ چیز ساز اِتگ کہ مرچی انسان ءَ پہ وت ءَ ھستیں پُر گنجیں اے دنیا جوڑینتگ۔ انسان ءَ گاراں چہ سپر کنان ءَ مرچی آزمان ءَ وت ءَ سر کُرتگ، اے ھمے سائنسی پٹ ءُ پول ءُ جھدانی برورد اِنت کہ انسان ءَ سیاسی، چاگردی، روزیگی، پوجی ءُ ایدگہ پِڑاں دیمروئی کنان ءَ مزن مزنیں کارپد ایر کُرتگ۔ دنیا ءَ ھمک راجاں کہ سائنسی زانشت ءِ وسیلہ ءَ چہ وتی جیڑھانی توجیل ساز اِتگ آیاں الم پہ وت راھے گشینتگ ءُ وت ءَ دنیا ءِ تہ ءَ مھکمیں راجے جوڑ کُرتگ۔
ءَ
آئی گوشتگ کہ بساک ءِ جھد اِنت کہ بلوچ زھگ ءُ ورنایانی نہ تھنا سیاسی بلکیں آیانی زانشتی، سیاسی ءُ سائنسی پِڑاں ھیلکاری ءَ بہ کنت دانکہ بلوچ ورنا اے دور ءِ دانا ترین ءُ زانتکارتریں ورنا جوجوڑ بہ بنت ءُ وتی راجی جیڑھانی توجیل ءَ پہ کردی پِڑ ءَ جھد بہ کن اَنت۔ ادارہ جھد کنت کہ سائنسی تک ءَ گیشتر ءُ شرتریں رنگے ءَ کار بہ کنت ءُ اے مراگشاں مستر کنان ءَ ایدگہ ھند ءُ دمگاں برجم بہ دار ایت۔
