کراچی ءَ زی شھید پروپیسر سبا دشتیاری ءِ شھیدی ءِ چاردھمی سالروچ ءِ درگت ءَ چہ سیدھاشمی ریپرنس لائیبریری دھکان گارڈن ملیر کراچی ءِ نیمگ ءَ دیوانے برجم دارگ بیتگ۔
دیوان ءَ بلوچستان ءِ نامداریں لبزانکار ڈاکٹر پروپیسر اے آر داد، سادک سبا، یوسپ ازیز گچکی، رمزان بامری ءُ الی ازگر آزگ ءَ ھوار مردماں بازیں کچے ءَ بھر زرتگ۔
دیوان سے بھرانی تہ ءَ بیتگ۔ شھید سبا دشتیاری ءِ زند ءُ ازم ءِ سر ءَ تران، سبا داد ءُ لچھی دیوان ھوار بیتگ۔ بلوچ ءِ مزن نامیں لبزانکاراں شھید استاد سبا دشتیاری ءِ بابت ءَ وتی ھیال درشان کرتگ اَنت۔
چہ سید ھاشمی ریپرنس لائبریری کراچی ءِ نیمگ ءَ یوسپ ازیز گچکی ءَ داد دیگ بیتگ۔ اے داد سید ھاشمی ریپرنس لائبریری کراچی ءِ پیشیگیں سرکماش رمزان بامری ءَ گوں وتی دستاں داتگ۔
دیوان ءِ سیمی بھر ءَ بلوچی زبان ءِ شائراں وتی ھیال درشان کرتگ اَنت۔
چوش کہ زی شھید سبا دشتیاری ءِ شھیدی سالروچ ءِ درگت ءَ شھید سبا دشتیاری چہ جتائیں بھرگاں سیادی داروکیں مردم ءُ اداراھانی نیمگ ءَ یات کنگ بیتگ۔
