تربت: چہ بگ ءَ زورگریں پاکستانی لشکر ءِ دست ءَ زور بیگواہ کنگ بیتگیں ورنا جیھند پنام ادنان بلوچ ءِ زوریں بیگواھی ءِ بگیری ءَ کھول ءَ تربت پریس کلب ءَ پریس کانپریس کرتگ ءُ گوشتگ کہ مئے کھول چہ 2013 ءَ ریاستی زوراکیانی آماچ اِنت۔
ھانی بلوچ ءَ تران کرتگ ءُ گوشتگ کہ مئے گس ءَ لشکر مدام بیڑ برگ ءُ گوں جنین ءُ زھگاں زوراکی کنگ ءَ اِنت ورنایاں آوار جنگ ءَ اِنت۔ 2014 ءَ مئے پنچ مردم زور بیگواہ کنگ بیتگ کہ آ داں دو ھپتگ ءَ آزارانی دیمپان کنگ بیتگ اَنت ءُ پد ءَ گوں نگیگیں جاوراں یل کنگ بیتگ اَنت۔
آئی ءَ گوشتگ کہ 2017 ءَ منی مستریں برات اکبال آوار جنگ بیتگ ءُ داں چاردہ ماہ ءَ جانی ءُ سسائی آزار دیگ ءَ پد یل کنگ بیتگ۔ ما پہ آئی جان سلامتی ءَ دبی ءَ دیم داتگ۔
ھانی بلوچ ءَ گوشتگ کہ جیھند بلوچ ءَ ما چہ ادنان بلوچ ءَ توار جن ایں آ تربت زانشتجاہ ءَ کانود ءِ نودربرے اِنت دوشی پاکستانی لشکر ءَ گس ءَ بیڑ برتگ ءُ آوار جنگ ءَ پد بیگواہ کرتگ۔ آ یک جپاکشیں نودربرے آئی دلگوش گوں وتی وانگ ءَ بیتگ۔
آئی ءَ گوشتگ کہ مئے کھول پمشکا زوراکیانی نشانگ کنگ بوگ ءَ اِنت کہ آئی مستریں برات ناسر بلوچ یک سْیاسی پارٹی یے بلوچ نیشنل موومنٹ ءِ بنجاھی سروکے۔ اگاں ریاست جیھند بلوچ ءَ تھنا پہ سْیادی ءِ بنیاد ءَ میاربار سرپد بیت گڑا کانود ءِ رد ءَ آمیدگس ءَ پیش کنگ بہ بیت ءُ بیڑ مہ بارت ءُ آوار مہ جنت۔
ھانی بلوچ ءَ گڈی ءَ گوں ریاستی ادارھاں لوٹ کرتگ ءُ گوشتگ کہ جیھند بلوچ داں سے روچ ءَ آمیدگس ءَ پیش کنگ بہ بیت اگاں نہ ما پہ زھرشانی ءُ نندانک ءَ لاچار بہ ایں۔
