اسلام آباد: سند سبھا ءِ سروک ا نام سندی ءُ وائس پار مسنگ پرسن سند ءِ سروک سسی لوھار اسلام آباد ءُ شتگ ءُ بلوچ یکجھتی کمیٹی ءِ نیمگ ءَ برجاھیں زھرشانی نندانک ءَ گوں زور یبگواھیں مردمانی کھولاں ھمدردی درشان کرتگ ، آیاں زھرشانی نندانک ءِ سروک ڈاکٹر ماہ رنگ ءُ سمی دین ءَ اجرک چادر مانپوشتگ۔
انام سندی ءَ تران کرتگ ءُ گوشتگ کہ من چہ سند سبھا ءِ نیمگ ءَ آتکگاں سند سبھا پہ زور بیگواھیں سندی کارکنانی آجوئی ءَ کارکنگ ءَ اِنت۔ما اد ءَ زھرشانی ءَ نشتگیں مردمانی ھمدردی ءَ آتکگیں من ھمے سرپد باں کہ اے جیڑہ تیوک ءَ بلوچستان ءِ نہ اِنت اِبید چہ پنجاپ ءَ سند ءُ آدگہ جاھاں ھم ھست ۔مئے دژمن یکین اِنت گڑا مارا گوں یکے دومی ءَ نزیک ءُ یکجاہ بوگی اِنت، اگاں ما یکجاہ بوت ایں گڑا ما جنگ ءَ مڑاِت ءُ وتی ھستمان ءَ رکینت کن ایں۔
آئی ءَ گوشتگ کہ من تیوک ءَ چہ سند سبھا ءِ نیمگ ءَ بلکیں تیوگیں سندی راج ءِ نیمگ ءَ اد ءَ آتکگاں۔ مارا چہ سند ءَ پنجاہ ءُ شست اجرک پہ زھرشانی ءَ نشتگیں مردماں دیگ بوتگ۔ مئے بلوچانی سیادی چہ سسی ءُ پنوں ءِ اشک ءِ کسہ ءَ بندات بوتگ ءُ مارا آ انگت ءَ مھکم کنگی اِنت۔ ھمے آجوئی لوٹوکانی دیمونی مئے تہ ءِ ترس ءَ ھلاس کنت ، اگاں مئے تہ ءِ ترس ھلاس بوت گڑا ما وتی آجوئی ءِ گرگ ءَ سوبین بہ ایں۔
