شال: بیگواھیں مردمانی کھولاں شال پریس کلب ءَ پریس کانپریس کرتگ ءُ گوشتگ کہ چہ ھزارانی کچ ءَ زوربیگواھیں مردمانی کھولاں ما لھتیں بیگواھیں مردمانی کھول اد ءَ ھواری ءَ پریس کانپریس کنگ ءُ وتی زور بیگواھیں مردمانی آجوئی ءِ لوٹءَ کنگ ءَ ایں۔ ما ھمے اوست ءَ دار ایں کہ شما مئے توار داں بنجاھی واکداراں سرکنگ ءَ مئے کمک ءَ کن اِت۔ ما زور بیگواھیں بلال بلوچ ء امام بکش، ازگر کمبرانی ء گلام الی، جواد اھمد ء کدر اللہ کمبرانی ءُ سید گل ء ھاجی گل ءِ کھول ایں۔
آئی ءَ گوشتگ کہ بلال بلوچ براھوئی زبان ءِ شائرے چہ شال ءَ زور بیگواہ کنگ بیتگ۔ شپ ءِ تھاری ءَ چیریں اداراہ ءُ آدگہ لشکری کارمنداں چار ءُچاردیوالی لگتمال کرتگ ءُ کھول ءِ مردم آزار داتگ اَنت، گس سرجم ءَ پٹ ءُ پول کرتگ اَنت ءُ پد ءَ بلال آوار جتگ ءُ گوں وت برتگ۔ پد ءَ ھما اِنت داں مرچی ءَ آئی ھچ وڑیں ھال نیست۔ کھول ءَ چنچو روچ اِنت کہ آئی ودار ءَ نشتگ انگت ءَ یل کنگ نہ بیتگ۔ آئی ھچ وڑیں ھال ءِ نہ رسگ ءِ سوب ءَ ما لاچار ایں کہ رسانکدرءُ لس مردمانی دیم ءَ وتی پریات ءَ پیش کنگ ءَ ایں۔
آئی ءَ گوشتگ کہ پانزدہ پروری ءِ شپ ءَ سیدگل چہ کلی آلم ھانءَ آلمو چاراہ ءَ شاہ جی مسیت ءِ نزیک ءَ زور بیگواہ کنگ بیتگ۔ دو ھپتگ ءِ گوزگ ءَ پد آئی ھچ وڑیں ھال نیست۔
آئی ءَ گوشتگ کہ ازگر کمبرانی براھوئی زبان ءِ گشندھے آبیست پروری ءَ چہ شال ءَ زور بیگواہ کنگ بیتگ۔ آ یک نادراھے ءُ انوں دگ ویلے ءَ آئی گردن ٹپی بیتگ۔ آ مدام درمان ورگ ءَ اِنت، ما پہ آئی ءِ نادراھی ءَ سک ترسگ ءَ ایں۔ اگاں آ زوت آجو نہ بوت پہ آئی جان ءَ باز ترس بیت۔
آئی ءَ گوشتگ کہ جواد اھمدءَ چل روچ ءَ گیش اِنت بیگواہ کنگ بیتگ ۔ آ 17 جنوری 2025 ءَ چہ سند ءَ سند سیون شریپ ءَ زور بیگواہ کنگ بیتگ۔ چہ آئی زوریں بیگواھی ءَ پد آئی کھول ءِ مردم سکا مالی پارست ءَ جنجال اَنت۔ جواد ءِ گس ءَ آئی کسانیں گھار، برات ءُ نادراھیں مات اِنت۔ ایشانی والینگ ءِ زمہ وار جواد بیتگ۔ چہ آئی زوریں بیگواھی ءَ پد کھول سکا جنجالانی دیمپان اِنت۔ ما ترسگ ءَ ایں کہ جواد ءَ زور بیگواہ کنگ ءَ پد دروگیں کیس جنگ یا دگہ درکانودی وڑے ءَ تاوان مہ دے اَنت۔ ما ھمے لوٹ ءَ کن ایں کہ زوت یل کنگ بہ بیت۔
آئی ءَ گوشتگ کہ دیم ءِ ماہ رمزان اِنت ما ھمےاوست ءَ دار ایں کہ ھمے ماہءِ برکت ءَ ریاستی ادارہ مئے مردماں آجو بہ کن اَنت ءُ مارا چہ اے رنجاں بہ کش اَنت۔ ما نہ لوٹ ایں کہ ما دگانی سر ءَ زھرشانی بہ کن ایں، اگاں داں سے روچ ءَ مئے آزیزا آجو کنگ نہ بوت اَنت ما لاچار ایں کہ سرجمیں شال ءِ جتائیں دگانی سرءَ زھرشانی ءَ بہ نند ایں۔
آئی ءَ گوشتگ کہ ما گوں شال ءِ شرپمندیں مردماں لوٹ کن ایں کہ آ مئے درد ءُ رنجاں سرپد بہ بنت ءُ مارا کمک بہ کن اَنت۔ ما دگاں بند کنگءُ مردماں جنجال کنگ نہ لوٹ ایں بلے دانکہ مئے مردم آجو نہ بیتگ اَنت ما بے توار بوت نہ کن ایں۔
آئی ءَ گوشتگ کہ ما گوں سرکار ءَ لوٹ کن ایں کہ آ مئے پریاتءَ گوش بدار ایت ءُ جواد، بلال، سیدگل، الی ازگر کمبرانی ءَ آجو بہ کنتءُمارا گیشتر جنجال مہ کنت۔
