آواران: زی پاکستانی لشکر ءِ جوڑ کرتگیں کشندہ ٹولی ءِ کارمندانی گون ءَ میڑے ءَ شھید بیتگیں بلوچ راجی سرمچار سکی بکش ءِ لاش گلزمین ءِ میار کنگ بیتگ ءُ شھید بالاچ ءِ لاش کھول ءَ دزگپتگ ءُ گریشگ ءَ برتگ۔
بنشون ءِ رد ءَ شھید سکی بکش ء الی بکش آواران آھوریءِ جاہ منند اِنت کہ شمبے ءِ بیگاہ ءِ سے ءَ تیرتیج ءَگلزمین ءِ میار کنگ بیتگ۔ پہ آئی لاش ءِ گڈی دیدار ءَ کِرءُ کشانی نزیکیں مردماں بازیں کچے ءَ بھر زرتگ ءُ شھید ستک شانی ندر کرتگ ءُ آئی لاش گوں گھگیری ءِ اوگام گڈی وابجاہ ءَ برگ ءُ سر کنگ بیتگ۔
گوں شھید سکی بکش ءَ ھوار شھید بوتگیں ھمبل بالاچ ء الی بکش گریشگ پوگی ءِ جاہ منند اِنت کہ آئی کھول ءَ لاش دزگپتگءُ دیم پہ گریشگ ءَ رھادگ بیتگ اَنت۔
چوش کہ شھید سکی بکش ءُ شھید بالاچ بلوچ آجوئی لوٹوکیں سرمچار اَنت زی بیگاہ ءَ آواران تیرتیج ءَ پاکستانی لشکر ءِ گون ءَ دیم پہ دیمی میڑے ءَ شھید بیتگ اَنت۔
اے بابت ءَ انگت ءَ چہ آجوئی لوٹوکیں گلانی نیمگ ءَ ھچ وڑیں درشان شنگ نہ بیتگ۔
