شال: پہ زور بیگواھیں مردمانی پد جنگ ءَ وی بی ایم پی ءِ شدکشیں زھرشانی گدان ءَ 5730 روچ سرجم بیتگ۔آدینگ ءِ روچ ءَ چہ تربت ءَ سیاسی ءُ چاگردی کارکن مھمد ھان، مھمد الی، مھمد نواز ءُ آدگہ مردم پہ ھمدردری درشان کنگ ءَ گدان ءَ اتکگ اَنت۔
وی بی ایم پی ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچستان ءَ لشکرکشی تیز کنگ بیتگ یک سالے ءَ سرکار ءَ پنچ ھزار بلوچ پسگ آوار جتگ۔ مردمانی زوریں بیگواھی ءِ ھواری ءَ سرجمیں میتگاں نشانگ کنگ ءَ اِنت۔ کیچ ءَ پاکستانی لشکر ءَ لشکرکشی ءِ جار جتگ۔ لشکر ءَ لس آبادیانی سر ءَ ارش کرتگ ءُ بلوچ پسگ آوار جتگ اَنت ءُ آیانی ژانگولیں لاشانی چگل دیگ تیز کنگ بیتگ۔
آئی ءَ گوشتگ کہ پاکستانی لشکر ءِ نیمگ ءَ بلوچ پسگانی زوریں بیگواھی ءُ پد ءَ آیانی دروگیں میڑاں کشگ ءِ درچ جنوری ءِ ماہ ءَ گیش کنگ بیتگ۔ نوشکے، ڈیرہ بگٹی ءَِ پد کیچ ءَ لشکرکشی ءَ پد چار زور بیگواھیں مردمانی آزار داتگیں لاش چگل داتگ ءُ آیان ءَ سلاہ بند لیک اتگ۔ سرجمیں سال ءَ بلوچستان ءَ پاکستانی لشکرءِ نیمگ ءَ آبادیانی سر ءَ ارش ، بلوچ پسگانی زوریں بیگواھی ءُ لٹ ءُ پل ءِ درچ برجاہ بیتگ۔
