شال: پاکستانی لشکر ءِ دست ءَ زوربیگواہ کنگ بیتگیں سراج اھمد جتک ءِ کھول ءَ پہ آئی ءَ توار چست کنگ ءِ لوٹ کرتگ ءُ گوشتگ کہ سراج اھمد جتک ء نسراللہ جتک مستونگ ءِ ھند پڑنگ آباد کلی رودریس ءِ جاہ منند اِنت پولیس ءَ 21 اگست 2021 ءَ چہ شال ءَ بی ایم سی نادراھجاہ ءَ دزگیر کرتگ ءُ برتگ، ھمے گوشتگ کہ جست ءُ پرس کنان ءُ داں شپ ءَ یل کنگ بیت، بازیں جھد ءَ پد آ 24 اگست ءَ چہ کرائم برانچ ءَ یل کنگ بوتگ۔
آئی گوشتگ کہ سراج اھمد چہ کرائم برانچ ءَ درکپتگ ءُ مزنیں دروازگ ءَ اتکگ چیریں ادارھانی کارمنداں پد ءَ آوار جتگ ءُ برتگ کہ انگت بیگواہ اِنت۔
آئی کھول ءَ گوشتگ کہ سراج ءِ زوربیگواھی ءَ پد مئے گس ویران اِنت ءُ ما جنجالانی دیمپان ایں۔ ما چہ سرکار ءُ انسانی ھکانی گل، سْیاسی گلاں ھوار گوں درسیں ادارھاں لوٹ کن آں کہ سراج اھمد ءِ آجو کنگ ءَ گامگیج بزور اَنت۔ اگاں آئی سر ءَ چونیں بھتامے ھست آ آمیدگس ءَ پیش کنگ بہ بیت۔
سراج اھمد ءِ کھول ءَ گوشتگ کہ گوں بلوچ راج ءَ لوٹ کن ایں کہ آ مئے گون ءَ ھمتوار بہ بنت ءُ سراج اھمد ءَ ھوار پہ درسیں زوربیگواھیں مردماں توار چست بہ کن اَنت۔
