پسنی: گوستگیں شپ ءَ چہ زورگریں پاکستانی لشکر ءِ دست ءَ آوار جنگ بیتگیں دگہ پنچ مردم پجارگ بیتگ۔
اھوالکار ءِ رد ءَ دوشی زورگریں پاکستانی لشکر ءَ پسنی چکلی ءَ گسے ءَ بیڑ برتگ ءُ وسیم پٹان ءُ وژدل پٹان آوار جنگ ءَ پد بیگواہ کرتگ اَنت۔ دوئیں مردم پسنی چکلی ءِ جاہ منند اَنت۔ آیانی کھول ءَ گوں بلوچ راج ءَ دزبندی کرتگ کہ پہ وسیم ءُ وژدل ءِ آجوئی ءَ توار چست بہ کن اَنت۔
ھمے وڑ ءَ دوشی زورگریں پاکستانی لشکر ءَ پسنی ءِ چہ وارڈ نمبر چار ءَ سالھ ء ریاز نامیں ورنایے آوار جتگ ءُ بیگواہ کرتگ۔
چہ ایشی ءَ اَبید زورگریں لشکر ءِ کارمنداں پسنی، کلانچی بازار ءَ بیڑ برتگ ءُ زمان ء پلان چہ گس ءَ آوار جنگ ءُ بیگواہ کرتگ۔ آوار جتگ بیتگیں زمان پیدارک ءِ جھمنند ءُ لھتیں سال بیت کہ آئی ءَ لڈ ءُ بار کرتگ ءُ پسنی کلانچی بازار ءَ اتکگ ءُ نشتگ۔ آئی ءِ زوربیگواھی گپ کھول ءَ راست کرتگ ءُ پہ آئی ءِ آجوئی ءَ توار چست کنگ ءِ لوٹ کرتگ۔
ھمے وڑ ءَ دوشی پاکستانی لشکر ءَ چہ پسنی ءَ اَلی بلوچ نامیں ورنایے ھم آوار جنگ ءَ پد بیگواہ کرتگ۔
چوش کہ پاکستانی لشکر ءَ دوشی پسنی ءِ جتا جتائیں ھنداں بیڑ برتگ ءُ باز مردم آوار جتگ ءُ بیگواہ کرتگ اَت۔ آیانی تہ ءَ شش مردم ساجد ء سوالی، پیسل ء سوالی، اھمد رزا ھان، سلیم رزا، نسیب سوالی ءُ مکبول اکرم پیسر ءَ پجارگ بیتگ اَنت۔
