بلوچ وومن پورم ءِ بنجاھی جارکش ءَ وتی شنگ کرتگیں درشانے ءَ گوشتگ که تربت ءَ بلوچ نودربر الله داد بلوچ ءِ کوش چه چیریں ادراھانی نیمگ ءَ بیتگ که بلوچ راج ءِ زانتکار ءُ وانندگیں سساھانی نشانگ کنگ ءِ شوندات اِنت ءُ ھزدار ءَ آسمه بی بی ءِ زوریں بیگواھی بلوچ ءِ دودانی بگیری اِنت ءُ ایشی ءَ ھچ کس نہ منّ ایت۔
آئی ءَ گوشتگ که بلوچستان ءَ درکانودی کوش ءُ زوریں بیگواھیانی بگیری ءَ سدانی کچ ءَ روانک کشگ ءُ زھرشانی یاداشت کنگ بیتگ اَنت۔ بلے ریاست وتی شونداتانی یل کنگ ءِ جاه ءَ آیاں گیش کنگ ءَ اِنت. اِے جیڑگے گپ اِنت که ریاست چے ءَ گوں ھینچو توار ، روانک ءُ زھرشانیاں ابید انگت وتی رویشت ءِ سر ءَ اوشتاتگ. راستی ءَ ریاست ھمے لوٹ ایٹ مارا ھمے سرپد به کنت که چه اِے روانک ءُ زھرشیاں ما را ھچ نه رس ایت ءُ گوں مردماں بے اوست بہ کنت ءُ آیانی سسائی پروش دیگ ءَ سوبین به بیت.
جارکش ءَ دیمتر ءَ گوشتگ که ما ریاست ءَ تچک ءَ اِے کلوه ءَ دے اِیں که گوں اِے وڑیں پندلاں مئے توکل ھجبر نزور نه بیت بلکیں گیشتر مھکم به اِیں ءُ گھگیری ءِ بیرک ءَ مک کن اِیں. پر ایمنیں زھرشانی ءُ مچی مئے زاتی ءُ کانودی ھک اِنت. چہ ما ھجبر بے اوست ءُ دزکش به اِین ءُ نہ وتی مردماں دمبرگ ءَ کل ایں۔
آئی ءَ درشان ءِ گڈی ءَ گوشتگ که ما ھمک بلوچ جنین ءُ ریاست ءَ ھچ وڑیں درکانودی ءُ رستری رویشتانی دیم ءَ بے توار بوگ ءَ نیل ایں، بلکیں گوں مچی توان ءِ ھواری ءَ داں گڈی زواکی ءُ گڈی زوریبگواھیں مردم ءِ آجوئی ءَ مئے جھد ءُ گھگیری برجاه بیت۔
