وائس پار مسنگ پرسن سند ءِ سرکماش سورٹھ لوھار ءَ وتی شنگ کرتگیں درشانے ءَ گوشتگ کہ پاکستانی لشکر ءُ چیریں ادارھانی کارمنداں ھمے سوڑگ کرتگ کہ نوں آ سند ءَ بلوچستان ءُ بنگلہ دیش ءَ وڑ ءَ کنگ ءُ سیاسی جھد ءَ ھلاس کنگ لوٹ اَنت۔
آئی گوشتگ کہ پاکستان ریاست سند ءَ سیاسی جھد ءِ راہ ءِ بند کنگ ءُ سیاسی جھد ءِ سر ءَ پابندی جنگ ءِ پندل ءَ کارمرز کنگ ءَ اِنت۔ سند ءَ پرکاریں سیاسی کارکن نودربر سروک گنی امان چانڈیو، امیر منگریو ءُ الی رزا ءِ سر ءَ سی ٹی ڈی پولیس ءِ نیمگ ءَ ناشرکاری ءِ دروگ ءُ بے سریں کیس جنگ ءَ اِنت دانکہ ریاست سند ءَ پرایمنیں سیاسی جھد ءَ ھر وڑ ءَ ھلاس بہ کنت۔ ایشی آسر چے بیت ایشی ءَ سندی راج ءُ جھان ءِ درسیں سیاسی، چاگردی ءُ مردمی ھکانی ادارہ شر زان اَنت۔
سورٹھ لوھار ءَ گوشتگ کہ پاکستانی لشکر ءُ چیریں ادارھانی نیمگ ءَ سند ءُ بلوچستان ءَ سیاسی کارکنانی آوار جنگ ءُ زور بیگواہ کنگ ءُ سی ٹی ڈی ءِ دست ءَ آیانی دروگیں میڑ نوکیں گپ نہ اَنت۔ چہ ایشی پیش اے وڑیں چنچو کیس یاداشت اِنت۔
آئی ءَ گوشتگ کہ وائس پار مسنگ پرسنز سند پاکستان ءِ سند ءَ برجاھیں اے زوراکیانی کیساں جھان ءِ درسیں میان استمانی ادارھاں توار چست کنگ ءِ ھواری ءَ تیوگیں سند ءَ ایشی پژدر ءَ زھرشانی کنگ ءِ جار ءَ جنت۔
سورٹھ لوھار ءَ گوشتگ کہ ریاست ءِ زوراکیانی آماچیں درسیں نودربر سروکانی کھول ءُ سند ءِ درسیں سیاسی، چاگردی، مردمی ھکانی گل ءُ راجدوستیں ٹولیانی ھواری ءَ اے جیڑہ ءِ سر ءَ یکشلیں جھد ءِ آھوکیں گامگیج ءِ وڑ ءُ پیماں ٹاھین ایں۔
