بلوچ یکجھتی کمیٹی ءِ سروک ڈاکٹر ماہ رنگ بلوچ ءَ ماں چاگردی رسانکدر ( ایکس ) ءَ وتی شنگ کرتگیں کلوھے ءَ گوشتگ کہ بلوچ چکیچنی ءِ بابت ءَ میان ءِ اُستمان ءِ بے توار بوگ بژنی گپ اِنت۔
آئی ءَ گوشتگ کہ 25 جنوری ، بلوچ چکچینی ءِ نام ءَ نامدات کنگ بیتگ۔ ھمے درگت ءَ دالبندن ءَ سکیں مزنیں زھرشانی یے کنگ بیتگ ءُ چہ سرجمیں بلوچستان ءَ ھما مردم کہ ریاستی زلم ءُ زوراکی ءِ آماچ اَنت آیاں بلوچ ءِ چکچینی ءِ بگیری ءَ اِے زھرشانی ءَ بھر زرتگ۔ بلے چہ آئی ءَ یک روچے پد 26 جنوری ءَ بلوچستان ءِ جتائیں ھنداں دگہ ھشت مردم بیگواہ کنگ بیتگ ، اِے اگاں چکچینی نہ اِنت گڑا چے یے ۔
ڈاکٹر ماہ رنگ ءَ گوشتگ کہ چہ بلوچستان ءِ تیاب دپی شھر گْوادر ءَ زاکر سومار ءُ نسیم ھمید چہ گٹی ڈور چاراہ ءَ زورانسری بیگواہ کنگ بیتگ اَنت۔
آئی ءَ گوشتگ کہ ھمے وڑ ءَ تربت، چاہ سر ءَ پاکستانی لشکر ءَ شپ ءِ دو ءَ زمیر سرور ءِ گسءَ بیڑ برتگ ، سرجمیں گس پٹ ءُ پول کرتگ ءُ زمیر آوار جنگ ءَ پد بیگواہ کرتگ۔
ڈاکٹر مھرنگ ءَ گوشتگ کہ پنجگور ءَ پاکستانی لشکر ءَ رھیم بکش ءِ گس ءَ بیڑ برتگ ءُ آئی ءِ سے زھگ ارشاد ، سادک ءُ زھور زوربیگواہ کرتگ۔
آئی ءَ گوشتگ کہ چہ ایشی ءَ اَبید بارکان ءَ اسلم کیتران ءُ بلوچی زبان ءِ اِزمکار ناری گلاب مری سرکاری مردماں آوار جتگ کہ آیانی گاڑیاں سرکاری نمبر پلیٹ بندوک بیتگ۔
ڈاکٹر مھرنگ بلوچ ءَ گوشتگ کہ بلوچ چکچینی ءِ بنیاد ءَ زور بیگواھی ترسناکیں سِلاھے جوڑ بیتگ کہ چہ ایشی ءَ بلوچ ءِ سرجمیں چاگرد اوشت ءِ آماچ اِنت ۔ ھچ بلوچ وتی گس ءِ تہ ءَ ھم ایمن نہ اِنت ۔ چہ ایشی ءَ ابید بلوچ ءِ برجاھیں چکچینی ءِ بگیری ءَ میان اُستمان ءِ بے تواری بژنی گپے۔
