بلوچ نیشنل موومنٹ ءِ سرکماش ڈاکٹر نسیم ءَ وتی درشانے ءَ گْوشتگ کہ بی این ایم ءِ زور بیگواھیں سروک ڈاکٹر دین مھمد ءِ زھگ ءُ انسانی ھکانی کارکن سمی دین مھمد ءِ سر ءَ اُرش کنگ ءِ جُھد نہ ایوک ءَ بُزدلی ءُ ایرجنگی اِنت بلکیں اے ریاست ءِ تُرس ءُ بےسوبی ءَ نشون دنت۔ سمی دین مھمد ءَ پانزہ سال اِنت کہ پہ وتی بھادریں پِت ڈاکٹر دین مھمد ریاست ءِ آزارجاھاں بند اِنت پہ آئی ءِ یل کنگ ءَ جُھد کنگ ءَ اِنت ءُ زوراکیانی دیمپانی ءَ کنگ ءَ اِنت،آئی ءِ سر ءَ اُرش کنگ ءِ پندل بلوچ راج ءِ باسمائی ءِ دارگ ءِ بے سوبیں جُھدے۔
آئی ءَ گْوشتگ کہ بلوچ راجی جُھد ءِ ھر مردم ءَ زانگ لوٹ ایت کہ اے وڑیں اُرش ریاست ءِ کپتگیں دیوال ءَ گیش پدر کنت۔ پاکستانی ریاست گوں وتی لشکری زور ءُ چیریں ادارھانی پندلاں بلوچ سروکاں نشانگ کنت، بلوچ جُھد ءَ ھلاس کنگ لوٹ ایت،بلے بلوچ راج ءِ مھکمیں گھگیری ءُ توان مدام آئی ءَ بے سوب کنت۔
ڈاکٹرنسیم ءَ گْوشتگ کہ سمی دین مھمد نہ تیوک ءَ مھکم ءُ دیمونی ءِ زندگیں دروے بلکیں بلوچ راجی باسمائی ءُ گھگیری ءِ چیدگ اِنت۔ ریاست ءَ زانگ لوٹ ایت کہ چوشیں اُرش مئے جُھد ءَ نزور کنگ ءِ جاہ گیش مھکم کن اَنت۔
آئی ءَ گْوشتگ کہ ما پاکستانی ریاست ءِ اے سلکاری ءَ گوں تُرندی ءَ ایر جن ایں ءُ ما جھان، انسانی ھکانی ادارہ ءُ گوں میان استمان ءَ دزبندی کن ایں کہ بلوچ راج ءِ سر ءَ برجاھیں زوراکی ءُ سروکانی سر ءَ بیتگیں اُرشاں دلگوش گْور بہ کنت۔ سمی دین مھمد بلوچ راجی جُھد ءِ یک مُھمکیں توارے ءُ آئی ءِ سر ءَ اُرش ءِ زمہ وار پاکستانی ریاست اِنت۔
وتی درشان ءِ گُڈی ءَ ڈاکٹر نسیم ءَ گْوشتگ کہ بلوچ راجی جُھد ءِ سروک ءُ باسک ھوار بنت ءُ ھرچ پندل ءِ دیم ءَ دار اَنت۔ بلوچ سرڈگار ءِ سر ءَ آجوئی ءِ جنگ برجاہ اِنت ءُ ما اے جُھد ءَ وتی مستریں سروکانی رنگیری ءَ رو ایں ءُ سوبمند بیں۔
