گوادر: جیمڑی ءَ زورگریں پاکستانی لشکر ءِ دست ءَ زور بیگواہ کنگ بیتگیں ورنا امران ءِ کھول ءِ نیمگ ءَ پانوانءَ زھرشانی نندانک دومی روچ ءَ برجاہ بیتگ۔ ھندی مردماں زھرشانی ءَ بھر زرتگ ءُ نشتگ اَنت۔
چہ زھرشانی نندانک ءَ زور بیگواھیں امران ءِ مات گراناز ءَ تران کرتگ ءُ گوشتگ کہ ما زی سھبءَ زھرشانی ءَ دگ بند کرتگ ءُ نشتگیں داں انوں کس پہ مئے گپانی گوش دارگ ءَ نہ یتکگ۔ زیکین اِنت کہ کسانیں زھگ ھم دگ ءِ سر ءَ بزگ اَنت۔
آئی ءَ گوشتگ کہ من وت نزاناں منی زھگ چے ءَ بیگواہ کنگ بیتگ؟ منی زھگ بے میار اِنت ءُ ناھک ءَ برگ بیتگ۔ منی زھگ ءَچونیں ھم میارے کرتگ گڑا آمیدگس ءَ آرگ ءُ پیش کنگ بہ بیت ءُ آئی میارباری گوشگ بہ بیت، اگاں بے میار اِنت گڑا مپت ءَ بند کنگ ءُ آزار دیگ مہ بیت ءُ مارا اد ءَ دگ ءِ سر ءَ بزگ مکن اِت۔
آئی ءَ گوشتگ دانکہ منی زھگ امران یل کنگ نہ بیتگ ما وتی زھرشانی ءَ برجاہ دار ایں۔
