بلوچ اسٹوڈنٹس ایکشن کمیٹی ءِ بنجاھی جارکش ءَ ماں رسانکدر ءَ وتی شنگ کرتگیں درشانے ءَ گوشتگ کہ گوستگیں پنچ روچ اِنت بلوچستان کتاب کاروان ءِ کتاب میڑہ برجاہ بوتگ اَنت۔
آئی ءَ گوشتگ کہ مرچی آدینگ ءِ روچ ءَ پنچ جنوری ءَ پنچمی روچ بوتگ کہ جتائیں شھراں کتاب میڑہ برجاہ بوتگ اَنت۔ اے نوکیں سال ءِ بندات بوگ ءَ کتاب میڑہ پنچمی روچ ءَ پسنی، بلیدہ، تجابان، رکنی، اورماڑہ ءُ ملیر ءَ برجاہ بوتگ اَنت۔
آئی ءَ گوشتگ کہ اسٹالاں گوستانک، لبزانک، راجکاری، پلسپہ، سائنس ءَ ھوار آدگہ بنگپانی سر ءَ کتاب ایر کنگ بوتگ اَنت۔ مزنیں کچے ءَ نودربر ءُ استاداں ھوار جتائیں بھرگاں سیادی داروکیں مردم اسٹالاں آتکگ اَنت ءُ وتی دل دوستیں کتاب اِش زرتگ اَنت۔
بنجاھی جارکش ءَ دیمتر ءَ گوشتگ کہ بلوچستان کتاب کاروان ءَ برجاہ دار این ءُ باند ءَ ششمی روچ ءَ ھم جتائیں جاھاں کتاب میڑہ برجاہ بنت۔ اے جاھانی تہ ءَ پسنی، ھورماڑی ءُ پیشکان ھوار اَنت۔
آئی ءَ گوشتگ کہ کتاب میڑھانی مول راج ءَ زانشت ءِ پڑا شیوار کنگ اِنت داںکہ آ وتی راج ءَ ھوار جھان ءِ آدگہ زانشتاں سرپد بہ بنت۔ مرچان کتاب وانگ سک کم بوتگ بلے مئے اے کاروان ءِ مول ھمیش اِنت کہ ما چاگرد ءِ تہ ءَ کتاب دودمانے جوڑ بہ کن این ءُ مئے چپ ءُچاگرد ءَ کتاب بہ بیت۔
